သုတ၊ မတ်လ ၁ ရက်၊ လားရှိုး
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် လားရှိုးမြို့မှာ တစ်ရက်အတွင်း ကား ၂ စီး ခိုးယူခံရပြီး စစ်ကောင်စီဘက်က အရေးယူနိုင်တာ မရှိသေးဘူးလို့ မြို့ခံတွေက ရွှေဖီမြေကို ပြောပါတယ်။
ကား သူခိုးတွေဟာ အုပ်စုလိုက် ခိုးယူနေတာဖြစ်ပြီး နေအိမ်ထဲအထိ ဝင်ရောက် ခိုးယူတာနေကာ လိုင်စင်ရှိတဲ့ ကားတွေကို ရဲစခန်းမှာ တိုင်ကြားခဲ့ပေမဲ့ ခိုးယူခံရတဲ့ကားတွေ တစ်စီးမှ ပြန်ရတာ မရှိဘူးလို့ လားရှိုးမြို့မှာ ကား အရောင်းအဝယ် လုပ်နေသူတစ်ဦးက ရွှေဖီမြေကို ပြောပါတယ်။
“တစ်ရက်တည်းကို နှစ်စီးလောက် ပျောက်တယ်။ လားရှိုး ပန်းခြံထဲလည်း ခိုးခံရတာပဲ။ ကားတွေက ဆက်တိုက် ပျောက်နေတာ။ အုပ်စုလိုက် ခိုးနေတာ”
လားရှိုးမြို့ကို စစ်ကောင်စီတပ် ပြန်ထိန်းချုပ်ပြီးနောက် မြို့တွင်းမှာ မူးယစ်ဆေးဝါး သုံးစွဲသူ၊ ခိုးမှု၊ လုယက်မှုနဲ့ ဓားပြတိုက်မှု ပိုများလာတာ တွေ့ရတယ်လို့ နောက်ထပ် လားရှိုးမြို့ခံ အမျိုးသားတစ်ဦးက ပြောပါတယ်။
“ကိုးကန့် ထိန်းချုပ်တုန်းက ဘိန်းစားတွေက ထောင်ထဲ ရောက်ကုန်တာလေ။ အခု ရပ်ကွက် ၅ ရေကန်တောင်မှာ ဘိန်းစားတွေလည်း ပေါလာတယ်”
လားရှိုးမြို့ကို စစ်ကောင်စီ ပြန်ထိန်းချုပ်ပြီးနောက် ဓားပြတိုက်မှုအပြင် လူသတ်မှု၊ ခိုးမှုတွေ မကြာခဏ ဖြစ်ပွားနေပြီး စစ်တပ်ဘက်က လက်ရှိအချိန်ထိ အရေးယူနိုင်တာ မရှိသေးပါဘူး။
ပြီးခဲ့တဲ့ ဖေဖော်ဝါရီ ၂၄ ရက်မှာလည်း လားရှိုးမြို့ ရပ်ကွက် ၅ ရှိ ကုန်စုံဆိုင်တစ်ခုမှာ အရပ်ဝတ်နဲ့ အမျိုးသား ၃ ဦးက ဆိုင်ထဲ ဝင်လာပြီး ဆိုင်ထဲက အသက် ၂၀ ကျော်အရွယ် အမျိုးသမီးတစ်ဦးကို သေနတ်ထောက်ပြီး ဖမ်းဆီးခေါ်ဆောင်သွားကာ ငွေ သိန်း ၁ ထောင်နဲ့ ပြန်ရွေးခိုင်းခဲ့တဲ့ဖြစ်စဉ် ဖြစ်ပွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
