မိုင်းရူပ၊ မတ်လ ၁ ရက်၊ လားရှိုး
ရှမ်းမြောက် လားရှိုးမြို့မှာ စစ်ကောင်စီနဲ့ ကိုးကန့်တပ်မတော်-MNDAA တို့အကြား ထပ်မံတွေဆုံပြီးနောက် စစ်သုံ့ပန်း ၂၀၀ ကျော်ကို ကိုးကန့်တပ်က ပြန်လွှတ်ပေးခဲ့တယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
စစ်ကောင်စီရဲ့ စစ်သုံ့ပန်း ၂၀၀ ကျော်ကို MNDAA ဘက်က မနေ့ ဖေဖော်ဝါရီ ၂၈ ရက်မှာ လားရှိူးမြို့ လေယာဥ်ကွင်းအနီးကို လာရောက်ပို့ဆောင်ပေးခဲ့တာဖြစ်တယ်လို့ ဆိုပါတယ်။
“မနေ့က ၂၀၀ ကျော် လွှတ်ပေးတယ်။ အဲထဲမှာ စစ်ကောင်စီဝန်ထမ်း၊ စစ်သားတွေလည်းပါတယ်။ လားရှိုး လေယာဥ်ကွင်းအနီးမှာ လာပို့ပေးတာ။ မိသားစုတွေ လာကြိုတာအများကြီးဘဲ။ ထပ်လွှတ်ပေးဖို့ ရှိသေးတယ်လို့ ကြားတယ်” လို့ လားရှိုးမြို့ခံ အမျိုးသာတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၂၈ ရက်မှာ လားရှိူးမြို့ ဆင်နှစ်ကောင်ဟိုတယ်မှာ စစ်ကောင်စီနဲ့ MNDAA တို့တွေ့ဆုံပြီးနောက် ကိုးကန့်တပ်ဘက်က ဖမ်းဆီးရမိတဲ့ စစ်ကောင်စီရဲ့ စစ်သုံ့ပန်းတွေကို ပြန်လွှတ်ပေးခဲ့တာ ဖြစ်ပါတယ်။
အခု ပြတ်လွှတ်ပေးခဲ့တဲ့ စစ်သုံ့ပန်းတွေဟာ ပြီးခဲ့တဲ့ ဇန်နဝါရီ ၂၅ ရက်မှာ တကျောင်ပူဇော်ပွဲအထိမ်းအမှတ်အနေနဲ့ စစ်ကောင်စီတပ်ဖွဲ့ဝင် ၅၀၀ ဦးကို MNDAA ဘက်က ပြန်လွှတ်ပေးမယ်ပြောခဲ့ပေမယ့် ၂၀၀ကျော်သာပြန်လွှတ်ပေးခဲ့ပြီး အခု ကျန်ရှိနေသူတွေကို ထပ်မံလွှတ်ပေးခဲ့တာ ဖြစ်ပါတယ်။
ပြီးခဲ့တဲ့ ၂၀၂၅ ခုနှစ် နိုဝင်ဘာလထဲမှာလည်း စစ်ကောင်စီရဲ့ စစ်သုံ့ပန်း ၂၀၀ ကျော်ကို ကိုးကန့်တပ်က လွှတ်ငြိမ်းခွင့်ပေးခဲ့ပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် ၂၀၂၅ ခုနှစ်ဇန်နဝါရီလကစပြီး ကိုးကန့်တပ်နဲ့ စစ်ကောင်စီတပ်အကြား အပစ်ရပ်ထားတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
