လွေးဇွန်မိုး၊ ဖေဖော်ဝါရီ ၂၅ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့မှာ ၃ ရက်အတွင်း ဓားပြတိုက်မှုနဲ့ ပြန်ပေးဆွဲမှု ၂ ကြိမ် ဖြစ်သွားခဲ့တယ်လို့ ဒေသခံတွေဆီက သိရပါတယ်။
မနေ့ ဖေဖော်ဝါရီ ၂၄ ရက် ညနေ ၄ နာရီခွဲမှာ ရပ်ကွက် ၅ ရှိ ကုန်စုံဆိုင်တစ်ခုမှာ အရပ်ဝတ်နဲ့ အမျိုးသား ၃ ဦးက ဆိုင်ထဲဝင်လာပြီး ဆိုင်ထဲက အသက် ၂၀ ကျော်အရွယ် အမျိုးသမီးတစ်ဦးကို သေနတ်ထောက်ပြီး ခေါ်ဆောင်သွားခဲ့တာကို အွန်လိုင်းပေါ်မှာ ပျံ့နှံ့လာတဲ့ CCTV မှတ်တမ်းအရ သိရပါတယ်။
လားရှိုးမြို့နယ်မှာ ခိုးမှု၊ ဓားပြတိုက်မှုနဲ့ လုယက်မှုတွေ မကြာခဏဖြစ်ပွားနေပေမဲ့ စစ်ကောင်စီတပ်က ဖမ်းဆီးအရေးပေးတာတွေ မရှိဘူးလို့ ဒေသခံ အမျိုးသားတစ်ဦးက ပြောပါတယ်။
“နယ်ထိန်းတွေကို ဖုန်းဆက်တိုင်တာ။ သူတို့နဲ့ မဆိုင်ဘူးတဲ့။ ရက်ကွက်ထဲက ပြဿနာ လိုက်ရှင်းပေးရမှာလားတဲ့။ ရက်ကွက်ထဲက လောင်းကစား၊ နှစ်လုံး သုံးလုံးကျတော့ ပိုက်ဆံကောက်ပြီး။ ခဏခဏ လုခံရတယ်။ ဆိုင်ကယ်တွေ ပျောက်တယ်။ လိုက်မဖမ်းဘူး။ တနေကုန် ခါခူးထိုင်သောက်နေတာ။ လူကြီးမေးရင်တော့ ကင်းပတ်နေတယ်။ သူခိုးလိုက်ဖမ်းနေတယ်”
အလားတူ ပြီးခဲ့တဲ့ ဖေဖော်ဝါရီ ၂၂ ရက် ည ၇ နာရီခွဲဝန်းကျင်မှာလည်း လားရှိုးမြို့ အဝေရာ လမ်းသွယ် (၇) မှာ အမျိုးသမီးတစ်ဦး ဓားပြတိုက်ခံရပြီး ရွှေဆွဲကြိုး၊ ငွေသား သိန်း ၂၀ နဲ့ ဖုန်းတွေ ပါသွားတယ်လို့ အထက်ပါ အမျိုးသားက ပြောပါတယ်။
လားရှိုးမြို့မှာ ပြီးခဲ့တဲ့ ဖေဖော်ဝါရီ ၁၈ ရက်မှာလည်း စျေးကနေ ပြန်လာတဲ့ အမျိုးသမီး ၁ ဦးကို အမျိုးသား ၃ ဦးက သေနတ်ထောက်ပြီး ဓားပြတိုက်ခဲ့တယ်လို့ ဒီဖြစ်စဉ်ကို သိရှိထားသူ အမျိုးသားတစ်ဦးက ရွှေဖီမြေကို ပြောပါတယ်။
ဒါ့အပြင် ပြီးခဲ့တဲ့ ဖေဖော်ဝါရီ ၁ ရက် နေ့လယ် ၁၂ နာရီဝန်းကျင်မှာလည်း လာရှိုးမြို့ ရပ်ကွက် (၄) က ရွှေလုပ်ငန်း လုပ်ကိုင်တဲ့ အိမ်တစ်အိမ်ကို အမည်မသိ အမျိုးသား ၆ ဦးက ဝင်ရောက်ဓားပြတိုက်ခဲ့ပြီး ရွှေ ၅ ပိဿာ ပါသွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
