မိုင်းရူပ၊ ဖေဖော်ဝါရီ ၁၈ ရက်
စစ်ကောင်စီတပ်ဘက်က အတင်းအဓမ္မ စုဆောင်းတဲ့ တပ်သားတွေနဲ့ စစ်မှုထမ်းသင်တန်း အပတ်စဉ် (၂၂) ကို ဖွင့်လှစ်လိုက်ကြောင်း စစ်ကောင်စီက ဒီနေ့ ဖေဖော်ဝါရီ ၁၈ ရက်မှာ သတင်းထုတ်ပြန်လာပါတယ်။
အပတ်စဉ် (၂၂) သင်တန်းဖွင့်ပွဲကို ဒီနေ့ ဖေဖော်ဝါရီ ၂၂ ရက်မှာ စစ်ကောင်စီရဲ့ တိုင်းစစ်ဌာနချုပ် အသီးသီးမှာ ဖွင့်လှစ်ခဲ့တယ်လို့ စစ်ကောင်စီရဲ့ ထုတ်ပြန်ချက်ထဲ ဖော်ပြထားပါတယ်။
စစ်ကောင်စီတပ်ဟာ အပတ်စဉ် ၁ ခုကို စစ်မှုထမ်းတပ်သား ၅၀၀၀ အထိ သတ်မှတ်ထားပြီး နိုင်ငံတဝန်းက ၎င်းတို့ ထိန်းချုပ်နိုင်တဲ့ ဒေသတွေမှာရှိတဲ့ လူငယ်တွေကို အတင်းအဓမ္မ စုဆောင်းပြီး စစ်သင်တန်းပေးကာ ရှေ့တန်း စစ်မြေပြင်မှာ ပို့ဆောင်နေခဲ့ပါတယ်။
စစ်ကောင်စီတပ်က တအာင်းတပ် – TNLA ထံ ပြန်လည် ထိန်းချုပ်နိုင်ခဲ့တဲ့ ရှမ်းမြောက် နောင်ချိုနဲ့ ကျောက်မဲမြို့ အပါအဝင် လားရှိုး၊ တန့်ယန်းမြို့နယ်တွေမှာလည်း စစ်မှုထမ်းဖို့ စစ်ကောင်စီတပ်ဘက်က စတင် စုဆောင်းနေပြီလို့ ဒေသခံတွေက ရွှေဖီမြေကို ပြောပါတယ်။
“ကျောက်မဲမှာ ဖေဖော်ဝါရီ ၂၂ ရက် နောက်ဆုံးထားပြီး လူစုခိုင်းထားတယ်။ လူထုတွေကတော့ စိုးရိမ်နေကြတာပေါ့” လို့ ကျောက်မဲမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
စစ်မှုထမ်းသင်တန်း အပတ်စဉ် ၂၂ အထိ စစ်ကောင်စီတပ်ဘက်က တပ်ဖွဲ့ဝင် ၁ သိန်းကျော်အထိ ရရှိနေပြီဖြစ်ပြီး အပတ်စဉ် ၁၉ အထိ သင်တန်းဆင်းထားပြီ ဖြစ်ပါတယ်။
ပြီးခဲ့တဲ့ ၂၀၂၄ ခုနှစ် ဖေဖော်ဝါရီလ ၁၀ ရက်မှာ စစ်ကောင်စီတပ်က စစ်မှုမထမ်းမနေရ ဥပဒေကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က အတည်ပြု ပြဌာန်းခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
