ပိုႈလဘား၊ ကျံရ်ႎှဲပ်ဘျူရီ ဆငည်း 13၊ မူစယ်
တိုအီးအရာပ်ကောန်အီမာည်းအူအီး က္လာင်းဒါႈ ဒီဘိူန်းဘဝ်ကီုက်ဒါင်း 3 ဖုင်ကဲတထိင်ခြဲ ပကပီုန်ဆျှံမ်ကဒါႇပိူည် လှံင်မူစယ် ပ 105 မဲင်နီန် ဂေါႇမိုႈကဲငျားဒေကိုႈဟာဝ်းမဴင်နီန်ဒါဘိုတ် စီပဲန်ဖါ်ႈပဒူႈ ကောန်အီမာည်းအူအီး ကာည်း ကောန်အီပ်ုန်အူအီး ကတူႈဖေးဘာတ်ဟာဝ်းအောႏ။
ကဲဒါႈ အမှိူဝ် ကျံရ်ႎှဲပ်ဘျူရီ ဆငည်း 12 ခီညှာကပံတ် 10 နြီဒိူန် ခေဲင်လှံင်မူစယ် ပ 105 မဲင်နီန် ကောန်အီမာည်းအူအီး ခိင်ရေဲန်အ်ုန်တ ဆပဲဆငါးနီန် ငျားဒေကိုႈမဲင်ဒါဘိုတ်အောႏ။
က္လာင်းဒါႈ “ အ်ုန်ရေဲန်ဆပဲဆငါး ပဂိုတောင်အ်ုန်အီဂေါည်ခြူမ်တံပ်ဒီန်အူလှေ။ အ်ုန်စိငျားကိုႈမဴင်ဒီန်ဒါဘိုတ် စီပဲန်ပဒူႈ လဟာဝ်းကောန်အီပ်ုန်အ်ုန်အီဂေါည် ခေဲင်ဒီန်အူအီး။ ဆာ်ိမုႈအ်ုန်စိ လဟာဝ်ဇိူင်အ်ုန် ကာည်း တည်အ်ုန်ကာည်း ႎဲ့အ်ုန် ကတူႈဖေးဘာတ်ဟာဝ်း”။
ဂေါႇမဴင်ပဒူႈဒီန် လဟာဝ်းကောန်အီမာည်း ကဝ်အီဇီုဝ် ကိုအိုက်ပန်းအောင် ဘိူန်းအဆာက် 38 ဆန်ုမ် ကာည်း ကောန်အီပ်ုန် ကဝ်အီဇီုဝ် မသင်းမာလွင် ဘိူန်းအဆာက် 40 ဆန်ုမ်နီန်အောႏ။
ကဲဒါႈ ကဇေန်နီး ကဝ်အီဇီုဝ်ကိုအိုက်ပန်းအောင် ကာည်း မသင်းမာလွင်ဒီန် ရံပ်ခါမ်ဘည်ဆနံမ်း ပယုင်ဆနံမ်ဒါင်မူစယ်အောႏ။
ခည်ဆန်ုမ် 2025 ဆီုင်ခည်ကျံရ်မေဒိူန် ပ 105 မဲင်နီန် ကဝ်အီဇီုဝ် ဦးမန်ဘဟာဒူး ဘိူန်းအဆာက် 42 ဆန်ုမ်နီန် ခိင်ဟျံင်အ်ုန်တမံက်နီန် ငျားဒေတက်ုတ်မဴင် ဂေါႇမိုႈပဲန်ပဒူႈ လယံမ်းဟာဝ်းဖါ်ႈအ်ုန်အောႏ။
တောပ်ဘည်စြာင်း ပ်ုန်ကစုအူန်းဖုင်ဆျှိုည်ဖီမျေကဲ ပကပီုန်ဆျှံမ်ကဒါႇပိူည်နီန် ခေဲင်ဆန်ုမ် 2025 နီန် ဂေါႇမဴင်ပ်ုန်တီႇခေဲင်ကတာည်းနီန် တောပ်ပည်ကောန်ကညောမ် 2 အီး 9 အီးယံမ်းဟာဝ်းဖါ်ႈ ဆဲႈဒီန်တောပ်ပည်ကောန်ကညောမ် 6 အီး ကဲအီကတူႈဖေးဘာတ်နီန် ဂေါည် 27 အီးအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
