ရွှေဖီမြေ၊ ဖေဖော်ဝါရီ ၅ ရက်
ဒီနေ့ ဖေဖော်ဝါရီ ၅ ရက်မှာ ကျရောက်တဲ့ ၆၅ နှစ်မြောက် ကချင်တော်လှန်ရေးနေ့မှာ ညီနောင်မဟာမတ် ၃ ဖွဲ့ဖြစ်တဲ့ တအာင်းတပ် TNLA၊ ကိုးကန့်တပ် MNDAA၊ အာရက္ခတပ်တော် AA တို့က သဝဏ်လွှာ ပေးပို့ခဲ့ကြပါတယ်။
ညီနောင်မဟာမိတ် ၃ ဖွဲ့ပေးပို့တဲ့ သဝဏ်လွှာထဲမှာ ၆၅ နှစ်ကြာ တော်လှန်ရေးကာလအတွင်း အသက်၊ သွေး၊ ချွေး ပေးဆပ်ခဲ့ရတဲ့ ကချင်အာဇာနည်တွေနဲ့ သူရဲကောင်းတွေကို ဦးညွတ်အလေးပြုတယ်လို့ ဖော်ပြထားပါတယ်။
ကချင်တပ်မတော် KIO/KIA ဟာ လက်ရှိအချိန်အထိ တော်လှန်ရေးကို ဆက်လက်ဆင်နွှဲနေပြီး မျှော်မှန်းထားတဲ့ ရည်မှန်းချက်နဲ့ ကချင်လူထုတွေ မျှော်လင့်တောင့်တနေတဲ့ မျှော်လင့်ချက်တွေ အမြန်ဆုံးပြည့်ဝဖို့ ဆုတောင်းကြောင်း ညီနောင်မဟာမိတ် ၃ ဖွဲ့က ဆိုပါတယ်။
KIA နဲ့ ညီနောင်မဟာမိတ် ၃ ဖွဲ့ဟာ “ဝ” တပ်ဖွဲ့ UWSA ဦးဆောင်တဲ့ ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ FPNCC ရဲ့ အဖွဲ့ဝင်တွေဖြစ်သလို မြောက်ပိုင်းမဟာမိတ်တပ်တွေလည်း ဖြစ်ကြပါတယ်။
ရှမ်းမြောက်မှာ ၁၀၂၇ စစ်ဆင်ရေး စတင်ပြီးနောက် မြောက်ပိုင်းမဟာမိတ်တွေအကြား နယ်မြေအငြင်းပွားမှုတွေ ဖြစ်ခဲ့ကြပြီး နယ်မြေအငြင်းပွားမှုတွေကို နိုင်ငံရေးနည်းလမ်းနဲ့ ဖြေရှင်းကြမယ်လို့ ထိပ်ပိုင်းခေါင်းဆောင်တွေက ပြောဆိုကြပါတယ်။
ဒီနေ့ ကျရောက်တဲ့ ၆၅ နှစ်ပြည့် ကချင်တော်လှန်ရေးနေ့ကို အမျိုးသားညီညွတ်ရေးအစိုးရ NUG လည်း သဝဏ်လွှာ ပေးပို့ခဲ့တာ တွေ့ရပြီး နွေဦးတော်လှန်ရေးကို KIA ဦးဆောင်မှုအပေါ် အသိအမှတ်ပြု ဂုဏ်ယူကြောင်း ဖော်ပြထားပါတယ်။
KIO/KIA ရဲ့ ဥက္ကဋ္ဌ ဗိုလ်ချုပ်ကြီးအင်ဘန်လကတော့ နွေဦးတော်လှန်ရေး အင်အားစုနဲ့အတူ စစ်ရေး၊ နိုင်ငံရေး အောင်မြင်မှု ပိုမိုရရှိစေရေး KIO က စနစ်တကျ စီမံဆောင်ရွက်နေပြီး စစ်ကောင်စီရဲ့ သွေးခွဲမှုတွေကို မခံကြဖို့ လိုအပ်တယ်လို့ ၆၅ နှစ်ပြည့် ကချင်တော်လှန်ရေးနေ့ မိန့်ခွန်းမှာ ထည့်သွင်းပြောကြားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
