လွေးဇွန်မိုး၊ ဇန်နဝါရီ ၂၆ ရက်၊ နမ့်ခမ်း
တအာင်းတပ် ထိန်းချုပ်ထားတဲ့ ရှမ်းမြောက် နမ့်ခမ်းမြို့ သာယာကုန်းရပ်ကွက်အနီးရှိ ရာဘာခြံအနီးမှာ ကလေးငယ်တစ်ဦး ရေအိုင်ထဲ ရေဆင်းဆော့ကစားရာကနေ ရေနစ်သေဆုံးသွားခဲ့တယ်လို့ ဒေသခံတွေက ပြောပါတယ်။
ဒီနေ့ ဇန်နဝါရီ ၂၆ ရက် နေ့လည် ၂ နာရီဝန်းကျင်မှာ သာယာကုန်းရပ်ကွက်ရှိ ရာဘာခြံအနီးက ရေအိုင်ထဲမှာ အသက် ၁၁ နှစ်အရွယ် မောင်ဒေဝစ်ကြာဟာ ရေဆင်းဆော့ရာကနေ ရေနစ်သွားပြီး နေ့လည် ၃ နာရီခွဲကျော်မှာ အလောင်းပြန်တွေ့ခဲ့တာလို့ ဆိုပါတယ်။
“အစက ကလေး လေးငါးယောက်လောက်ရှိတယ်။ ကလေးတွေက အဲဒီနားမှာ တုတ်နဲ့ လိုက်စမ်းနေတာ။ အဲဒါကို ဦးလေးကြီးတစ်ယောက်တွေ့တော့ ကလေးတွေကို သွားခိုင်းတာ။ အဲဦးလေးကလည်း အဲနားမှာ ကလေးရေနစ်နေမှန်း မသိဘူးလေ။ ကလေးတွေကိုဆူတော့ ကလေးတွေကလည်း ကြောက်ပြီး ထွက်သွားကြတာ။ ကလေးတွေ ပြန်သွားပြီးတဲ့နောက်မှ သူများက ကလေးအဝတ်ကျန်နေခဲ့တာကို တွေ့တာ။ အဲချိန်ကြမှပဲ ကလေးရေနစ်မှန်းသိပြီး ရေထဲဆင်းရှာကြတာ။ အဲနေရာက နည်းနည်းနိမ့်တော့ တရုတ်တွေ မြေထိုးရင်းနဲ့ ရေက နစ်နစ်လာတာ။ ရေက တစ်နေရာထဲ လာစုသွားပြီး အိုင်လိုဖြစ်သွားတာ” လို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။
ရေနစ်သေဆုံးသွားတဲ့ ကလေးဟာ နမ့်ခမ်းမြို့ ဟိုကတ်ရပ်ကွက်မှာ နေထိုင်သူဖြစ်ပြီး အ. ထ.က (၁) မှာ ပညာသင်ယူနေတဲ့ ဒုတိယတန်း ကျောင်းသားဖြစ်တယ်လို့ သိရပါတယ်။
ရေနစ်သေဆုံးသွားတဲ့ ကလေးရဲ့ ရုပ်အလောင်းကိုတော့ ဖြူစင်မေတ္တာ သွေးအလှူရှင်အသင်းက နမ့်ခမ်းပြည်သူ့ဆေးရုံ ရင်ခွဲရုံမှာ ပို့ဆောင်ထားတယ်လို့ အသင်းတာဝန်ရှိသူတစ်ဦးက ပြောပါတယ်။
အလားတူ ပြီးခဲ့တဲ့ ၂၀၂၅ ခုနှစ် နိုဝင်ဘာ ၁၇ ရက် နေ့လယ် ၃ နာရီဝန်းကျင်မှာလည်း နမ့်ခမ်းမြို့နယ် အထက်ပန်ယုတ်ရွာမှာ နေထိုင်တဲ့ အမျိုးသားတစ်ဦးက ဟိုဆိုင်းချောင်းထဲ ရေဆင်းကူးရာကနေ ရေထဲ မျောပါသွားပြီး သေဆုံးခဲ့တယ်လို့ ဒေသခံ အမျိုးသားတစ်ဦးက ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
