သူတော်စိန်၊ ဇန်နဝါရီ ၂၆ ရက်၊ မူဆယ်
တရုတ် – မြန်မာနယ်စပ် ရှမ်းမြောက် မူဆယ်မြို့ နန်းတော်ပေါက်နဲ့ ဆင်ဖြူပေါက်တွေမှာ နှစ်နိုင်ငံနယ်စပ်ဖြတ်သန်းခွင့်လက်မှတ် (BP)စာအုပ်အနီ ရက်လွန်သူတွေကို မတရားဝင်ရောက်မှု တားဆီးကာကွယ်ရေးအဖွဲ့(မကဖ ၅)လဝကဝန်ထမ်းတွေက ရက်လွန်ကြေးအဆမတန်တောင်းနေတယ်လို့ ဒေသခံတွေကပြောပါတယ်။
နှစ်နိုင်ငံ နယ်စပ်ဖြတ်သန်းခွင့်လက်မှတ် (BP)စာအုပ်အနီကို ကိုင်ဆောင်သူတွေဟာ နှစ်နိုင်ငံသဘောတူစာချုပ် MOC မှာပါတဲ့ စည်းကမ်းချက်အတိုင်း တရုတ်ပြည်ဘက်မှာ ၆ ညအိပ် ၇ ရက်(တစ်ပတ်)တစ်ခါ တံဆိပ်တုံးလာထုရမှာဖြစ်ပြီး ရက်ကျော်လွန်နေထိုင်ခဲ့သူတွေကို မကဖ(၅)လဝကဝန်ထမ်းများက ရက်လွန်ကြေး အနည်းဆုံး တရုတ်ငွေ ၂၀၀ ယွမ်တောင်းခံနေတာကြောင့် အခက်တွေ့နေတယ်လို့ ဒေသခံတွေက ပြောပါတယ်။
“ကျမ နှစ်ရက်လွန်သွားတာကို နန်းတော်ဂိတ်က တရုတ်ငွေ ၂၀၀ တောင် တောင်းတယ်။ မြန်မာငွေနဲ့ဆို တစ်သိန်းနှစ်သောင်းလောက်ရှိမယ်။ ဒါကြောင့် လျော့ပေးပါဦးလို့ ပြောလိုက်တော့ စာအုပ်သိမ်းသွားတယ်။ နောက်နေ့ သူတို့တောင်းတဲ့ တရုတ်ငွေ ၂၀၀ သွားပေးတော့မှ စာအုပ်ပြန်ပေးတယ်။ အခုက လူသစ်တွေ။ အရင် ဦးနေလင်းဦးတို့အဖွဲ့က ရက်လွန်ရင် မြန်မာငွေ ငါးထောင်၊ တစ်သောင်းတောင်းတယ်။ မပါလို့ နှစ်ထောင်ပေးလည်း ယူတယ်။ တစ်ထောင်ပေးလည်း ယူတယ်။ ဘာမှ မပြောဘူး။ အခုအဖွဲ့က တရုတ်ငွေပဲ တောင်းတာ။ အဲလောက် အများကြီးတောင်းတော့ အဆင်မပြေဘူးလေ” လို့ ဟိုနားရပ်ကွက် မြို့ရှောင်လမ်းမှာနေထိုင်သူ မူလတန်းပြဆရာမ ဒေါ်အေးအေးမော်က ရွှေဖီမြေကို ပြောပါတယ်။
အလားတူ ပြီးခဲ့တဲ့ ဇန်နနဝါရီ ၂၂ ရက် နေ့လည် ၂ နာရီမှာလည်း အသက် ၅၀ အရွယ် အမျိုးသားတစ်ဦးကို ဆင်ဖြူဂိတ်ရှိ မကဖ(၅) လဝကဝန်ထမ်းတစ်ဦးက ရိုင်းရိုင်းစိုင်းစိုင်းပြောဆိုပြီး တရုတ်ငွေ ၃၀၀ ယွမ် တောင်းခဲ့တယ်လို့ မျက်မြင်တွေ့ခဲ့သူဒေသခံတစ်ဦးက ပြောပါတယ်။
“ဥပဒေက ရက်လွန်ရင် အမှုဖွင့်ပြီး ဖမ်းခိုင်းတာ။ ငါတို့က မဖမ်းချင်လို့ ဒဏ်ဆောင်ခိုင်းတာ။ မင်းဒဏ်မဆောင်ချင်ရင် အဖမ်းခံမလား”
လက်ရှိ နန်းတော်ပေါက်နဲ့ ဆင်ဖြူပေါက်မှာ တာဝန်ထမ်းဆောင်နေတဲလ မကဖ(၅)လဝကဝန်ထမ်းတွေဟာ အပြောအဆို ရိုင်းစိုင်းပြီး ငွေကြေးအဆမတန်တောင်းယူနေတာကြောင့် ဒေသခံတွေက မူဆယ်ခရိုင်အုပ်ချုပ်ရေးမှူးရုံးကို တိုင်စာ ၁၅ စောင်ထက်မနည်း ပေးပို့တိုင်ကြားထားတာတွေရှိတယ်လို့လည်း စုံစမ်းသိရှိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
