မိုင်အရှိုင်း၊ ဇန်နဝါရီ ၂၄ ရက်၊ လားရှိုး
ရှမ်းမြောက် လားရှိုးမြို့ထဲက ရပ်ကွက်တွေမှာ စစ်ကောင်စီတပ်က အသက်ပြည့်ပြီးတဲ့ လူငယ်တွေရဲ့ စာရင်းတွေကို လိုက်ကောက်နေတယ်လို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
ဇန်နဝါရီ ၂၂ ရက်နေ့ကစပြီး လားရှိုးမြို့ ရက်ကွက် ၆၊ ၇ နဲ့ တခြားရပ်ကွက်တွေမှာ စစ်ကကောင်စီတပ်က အစည်းအဝေးလုပ်ပြီး လူငယ်တွေရဲ့ စာရင်းကို လိုက်ကောက်နေတာလို့ ဆိုပါတယ်။
“အိမ်ထောင်စု စာရင်းကတော့ တမြို့လုံးအတိုင်းအတာနဲ့ ကောက်တာ။ ဧည့်စာရင်းတော့ မဟုတ်ဘူး။ အခုက အသက်ပြည့်ပြီးတဲ့ လူငယ်တွေရဲ့ စာရင်းပဲ ကောက်တာ။”
အဲလို စာရင်းတွေ လိုက်ကောက်ရာမှာ ပြင်ပရောက်နေတဲ့ လူငယ်တွေရဲ့ စာရင်းတွေပါ ထည့်တွက်ကောက်တာဖြစ်ပြီး စစ်မှုထမ်းကောက်ဖို့ ဖြစ်တယ်လို့ ဆိုပါတယ်။
“လားရှိုးမြို့မှာ စစ်မှုထမ်းကောက်ဖို့ ပြင်နေကြပြီ။ မဲတော့ မနှိုက်ခိုင်းသေးဘူး။ အသက်ပြည့် လူဦးရေ လိုက်ကောက်နေတုန်းပဲ” လို့ အထက်ပါ သတင်းရင်းမြစ်က ပြောပါတယ်။
စစ်ကောင်စီတပ်ဟာ TNLA ထိန်းချုပ်ခဲ့တဲ့ နောင်ချိုမြို့ကို ပြန်လည်သိမ်းပိုက်ပြီးတဲ့ နောက်ပိုင်း စစ်မှုထမ်းဖို့ အရင်ဆုံး ရွာပိုင်းတွေမှာ တပ်သားကောက်ယူခဲ့ပါတယ်။
အခု လားရှိုးမြို့မှာလည်း လူငယ်စာရင်းတွေ လိုက်ကောက်နေတာကြောင့် စစ်မှုထမ်းဖို့ ခေါ်ဆောင်သွားခံရမှာကို မြို့ခံတွေ စိုးရိမ်ပူပန်နေကြတယ်လို့ သတင်းရင်းမြစ်တွေက ဆိုကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
