မိုင်းရူပ၊ ဇန်နဝါရီ ၁၈ ရက်၊ မယ်စဲ့
ကရင်နီပြည် မယ်စဲ့မြို့နယ်ရှိ အကျဉ်းထောင်တစ်ခုမှာ အကျဥ်းသား ၈၀ ကျော်က သေနတ်တွေ လုယူပြီး ထွက်ပြေးလွတ်မြောက်နေတယ်လို့ ကရင်နီပြည် ကြားကာလ အုပ်ချုပ်ရေးကောင်စီ- IEC ရဲ့ ပြည်ထဲရေးဌာနက သတင်းထုတ်ပြန်ပါတယ်။
ဒီနေ့ ဇန်နဝါရီ ၁၈ ရက် မနက်အစောပိုင်း ၁ နာရီဝန်းကျင်မှာ အကျဥ်းသား ၈၀ ခန့်က အချုပ်ထောင်ကနေ ထွက်ပြေးခဲ့တာဖြစ်ပြီး သေနတ် ၉ လက်ကိုလည်း ယူဆောင်သွားတယ်လို့ ထုတ်ပြန်ချက်ထဲ ပါရှိပါတယ်။
မြေပြင်အခြေသိရှိသူတစ်ဦးက “ထောင်စောင့်ကို သတ်ပြီး သေနတ် ၁၀ လက် ယူသွားတယ်။ သေနတ်တွေပါတော့ ခရီးသွားမယ့်သူတွေ ဂရုစိုက်ကြပါဗျ” လို့ ရွှေဖီမြေကို ပြောပါတယ်။
အွန်လိုင်းပေါ်မှာ ပျံ့နှံ့နေတဲ့ သတင်းတွေထဲမှာ ထောင်ဝန်ထမ်းကို သတ်ဖြတ်ပြီး ဖမ်းဆီးသွားတယ်ဆိုတဲ့ သတင်းတွေ မှန်ကန်မှုမရှိဘဲ တော်လှန်ရေးတပ်ဖွဲ့တွေနဲ့ ပူးပေါင်းပြီး ဆောင်ရွက်နေတယ်လို့လည်း ထုတ်ပြန်ချက်ထဲ ဖော်ပြထားပါတယ်။
ထွက်ပြေးလွတ်မြောက်နေတဲ့ အကျဥ်းသားတွေထဲမှာ တော်လှန်ရေးတပ်ဖွဲ့တွေ ဖမ်းဆီးရမိတဲ့ စစ်ကောင်စီရဲ့ တပ်ဖွဲ့ဝင်တွေ ဖြစ်တယ်လို့ ဒေသတွင်း သတင်းတွေမှာ ဖော်ပြထားပါတယ်။
IEC ရဲ့ ပြည်ထဲရေးဌာနကတော့ လူထုတွေ လုံခြုံရေးအတွက် တော်လှန်ရေးတပ်တွေနဲ့ ပူးပေါင်းပြီး သက်ဆိုင်ရာ လုံခြုံရေးအစီအမံတွေ ဆောင်ရွက်နေတယ်လို့ ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
