ခိုင်လေး၊ ဇန်နဝါရီ ၁၈ ရက်၊ ချောင်းဦး
စစ်ကိုင်းတိုင်း ချောင်းဦးမြို့နယ် မုံရွာ-မန္တလေး လမ်းပိုင်းတစ်နေရာက ဒေသခံပိုင်ဆိုင်တဲ့ အဆောက်အဦးတစ်ခုထဲ ကင်းပုန်းဝပ်ဖို့ ရောက်လာတဲ့ စစ်တပ်ကို မိုင်းဆွဲတိုက်ခိုက်ရာ ၄ ဦးထက်မနည်း သေဆုံးခဲ့တယ်လို့ ချောင်းဦးမြို့နယ် PDF က ထုတ်ပြန်ထားပါတယ်။
ဒီနေ့ ဇန်နဝါရီ ၁၈ ရက် မနက် ၉ နာရီ ၁၀ မိနစ်ခန့်မှာ စစ်သား ၂ ဦးက ကင်းပုန်းဝပ်ဖို့ ရောက်ရှိလာခဲ့ပြီး ၅ မိနစ်ခန့်အကြာမှာ ပြန်ထွက်သွားပြီးနောက် ၃ မိနစ်အကြာမှာတော့ ချောင်းဦးမြို့တွင်းမှ Faw ကား အဖြူရောင် ၂ စီး ခန့်မှန်းအင်အား ၂၅ ဦးကို ပဒေသာမိုင်းပွိုင့် ၄ လုံးနဲ့ တိုက်ခိုက်ခဲ့တယ်လို့ ချောင်းဦး PDF မှ တာဝန်ရှိသူတစ်ဦးက ပြောပါတယ်။
“စစ်တပ်က လူခွဲပြီး အဆောက်အဦးထဲ ဝင်တဲ့လူနဲ့ တချို့က ရှေ့မှာ ရပ်နေတဲ့အချိန်မှာ ကျနော်တို့ ပဒေသာမိုင်း ၂ လုံးနဲ့ အဆောက်အဦး ဝင်ပေါက်ကို မိုင်းဆွဲခဲ့တယ်။ နောက်နှစ်လုံးကို မုံရွာ-မန္တေလးလမ်းမကြီးကြားမှာ တစ်ပြိုင်နက် တိုက်ခိုက်ခဲ့တယ်”
မိုင်းဆွဲတိုက်ခိုက်မှုအပြီးမှာ အလောင်းနဲ့ ဒဏ်ရာ ရသူတွေကို သယ်ဆောင်ဖို့ လုံခြုံရေးယူကာ ထွက်လာတဲ့ စစ်သား ၅ ဦးကို ခြုံခိုတိုက်ခိုက်ဖို့ စောင့်ဆိုင်းနေတဲ့ ရဲဘော်နဲ့ ထိတွေ့မှု ဖြစ်ပွားခဲ့ရာ စစ်တပ်ဘက်မှတစ်ဦး ထပ်မံ သေဆုံးခဲ့တယ်လို့ ဆိုပါတယ်။
ဝမ်းဗိုက်ကို သုံးချက် သေနတ်မှန်တဲ့ နှစ်ပွင့်ဗိုလ်ကလည်း ချောင်းဦး ဆေးရုံးမှာ သေဆုံးခဲ့ကာ ခြေပြတ်တဲ့ နှစ်ယောက်လည်း အခြေအနေ မကောင်းဘူးလို့ ဆိုပါတယ်။
အဆောက်အဦးရှေ့မှာ လက်ရှိအချိန်ထိ စစ်သားအလောင်း ၃ လောင်း ရှိနေသေးကာ အဆောက်အဦးအတွင်းမှာလည်း အလောင်း ရှိသေးကြောင်း သတင်းရရှိထားတယ်လို့ ဆိုပါတယ်။
စစ်တပ်ဘက်က အထိနာတဲ့အတွက် လက်ရှိအချိန်ထိ အလောင်းကောက်ဖို့ ပြင်ဆင်နေတာကြောင့် မုံရွာ-မန္တလေး လမ်းပိုင်းကို သတိနဲ့ သွားလာဖို့၊ မဖြစ်မနေ သွားလာရင် သတင်းမေးပြီး သွားလာကြဖို့ ချောင်းဦး PDF ဘက်က ပြောဆိုထားပါတယ်။
