မိုင်းဖိူမ်းဆငဲ၊ ဒီဇင်ဘာ ၈ ရက်၊ မူဆယ်
ညီနောင်မဟာမိတ် ၃ ဖွဲ့ဖြစ်တဲ့ ရက္ခိုင့်တပ်တော် – AA၊ တအာင်းတပ်-TNLAနဲ့ ကိုးကန့်တပ် – MNDAA တို့ ပူးတွဲထိန်းချုပ်ထားတဲ့ မူဆယ်မြို့နယ် ၁၀၅ မိုင်မှာ MNDAA ရုံးတချို့မှာ မြန်မာနိုင်ငံအလံ လွင့်ထူနေတယ်လို့ ဒေသခံတွေဆီကနေ သိရပါတယ်။
မြန်မာနိုင်ငံရဲ့ အကြီးဆုံးကုန်သွယ်ရေးဇုန်ဖြစ်တဲ့ အဲဒီ ၁၀၅ မိုင်က MNDAA ရုံးဌာနတချို့မှာ မနေ့ ဇန်နဝါရီ ၇ ရက်ကစပြီး မြန်မာနိုင်ငံတော်အလံ စလွှင့်ထူတာလို့ ဆိုပါတယ်။
ဒေသခံ သတင်းရင်းမြစ်တစ်ဦးက “သူတို့နေတဲ့ရာတိုင်းထောင်တာမျိုးတော့ မဟုတ်ဘူး။ အရေးကြီးတဲ့ ရုံးတချို့ပဲ မြန်မာနိုင်ငံအလံထောင်တာ” လို့ ပြောပါတယ်။
ကိုးကန့်တပ်ဟာ ပြီးခဲ့တဲ့ ဒီဇင်ဘာ ၂၉ ရက် လားရှိုးမြို့မှာ စစ်ကောင်စီတပ်နဲ့ တွေ့ဆုံပြီးတဲ့နောက် လားရှိုးကနေ သီပေါအထိ သူတို့ဂိတ်တွေကို ဖယ်ရှားခဲ့ပါတယ်။
အဲဒီနောက်မှာပဲ တရုတ်က သူ့နိုင်ငံထဲ ကုန်ပစ္စည်းတင်သွင်းခွင့် ကန့်သတ်ချက်တွေရှိတဲ့ ချင်းရွှေဟော်နယ်စပ်ဂိတ်မှာတရုတ်က တင်ပို့ခွင့် ပြန်ပြုပေးခဲ့ပြီး ကြံနဲ့ ပြောင်းဖူးစတဲ့ ကုန်တင်ကား ရာနဲ့ချီဟာ ချင်းရွှေဟော်ဂိတ်ကနေ ကုန်သွယ်နေတယ်လို့ ကိုးကန့်တပ်က ထုတ်ပြန်ခဲ့ပါတယ်။
လက်ရှိ ကုန်သွယ်ရေးအပြည့်အဝ မဖြစ်မြောက်သေးတဲ့ ၁၀၅ မိုင်မှာ MNDAA ရုံးတွေမှာ မြန်မာနိုင်ငံတော်အလံ လွှင့်ထူတာဟာ တရုတ်-မြန်မာ ကုန်သွယ်ရေး ပုံမှန်ပြန်လည်ပတ်စေဖို့ လက္ခဏာဖြစ်တယ်လို့လည်း အကဲခတ်သူတချို့က ဆိုကြပါတယ်။
ဒါ့အပြင် မုံးကိုး၊ ကွတ်ခိုင်၊ သိန္နီမြို့က ကိုးကန့်ရုံးတွေမှာလည်း ကိုးကန့်တပ်က မြန်မာနိုင်ငံအလံ လွှင့်ထူထားတာကို တွေ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
