မိုင်းပန်ပျော်၊ ဇန်နဝါရီ ၁၈ ရက်၊ ကွတ်ခိုင်
ရှမ်းမြောက် ကွတ်ခိုင်မြို့နယ် လင်လိုင်ရွာမှာ ကချင်တပ်မတော်- KIA ရဲ့ တပ်သားတွေက ဆိုင်ကယ်သူခိုးလို့ စွပ်စွဲပြီး အမျိုးသားတစ်ဦးကို ရိုက်နှက်ခဲ့တာအပြင် ညာဘက် လက်ကိုပါ ဓားနဲ့ ခုတ်ခဲ့ပါတယ်။
မနေ့ ဇန်နဝါရီ ၁၇ ရက် နေ့လယ် ၁ နာရီဝန်းကျင်မှာ KIA ရဲ့ ဒေသကာကွယ်ရေးတပ်ဖွဲ့ဝင် ၄ ဦးက အသက် ၅၀ အရွယ် ဦးမောင်ဦးဆိုသူကို သူခိုးလို့ စွပ်စွဲပြီး စစ်ဆေးမေးမြန်းကာ ရိုက်နှက်ခဲ့တာလို့ ကာယကံရှင် ဦးမောင်ဦးက ပြောပါတယ်။
“အဲဒီရွာမှာရှိတဲ့ အိမ်တစ်အိမ်ကို ပိုင်ရှင် ရှိတယ်ထင်လို့ ကျနော်လည်း မီးခြစ် သွားယူသုံးလိုက်တယ်။ ပြီးမှ ကျနော် ထွက်သွားတယ်။ သူတို့ကလည်း နောက်က လိုက်လာတယ်။ သူတို့ အများကြီးဘဲ။ သေနတ်လည်း သုံးတယ်။ ကျနော့် ခေါင်းပေါ်မှာ သေနတ်ပြောင်းတွေဘဲ။ သူတို့လေးယောက် ရှိတယ်။ စစ်သားက သေနတ်လည်း ပါတယ်။ ကျနော်က ဘာမှမယူဘူး။ သူတို့က ကျနော့်ကို သေနတ်နဲ့ ထုတယ်။ လက်မှာလည်း ဓားနဲ့ ခုတ်တယ်”
ဦးမောင်ဦးကို စစ်ဆေးမေးမြန်းပြီးတဲ့နောက်မှာတော့ အဲဒီတပ်သားတွေက မိုင်းယုလေးအုပ်စုရှိ TNLA တပ်ဖွဲ့ထံ ပြန်လည် အပ်နှံပေးခဲ့တယ်လို့ ဆိုပါတယ်။
နမ့်ခမ်းမြို့နယ် လုံကံရွာခံဖြစ်တဲ့ ဦးမောင်ဦးဟာ KIA တပ်သားရဲ့ ရိုက်နှက်နှိပ်စက်မှုကြောင့် အပြင်းအထန် ဒဏ်ရာ ရရှိခဲ့ပြီး လက်ရှိမှာ ဆေးကုသဖို့အတွက် TNLA ရဲ့ နမ့်ဖတ်ကာ တရားဥပဒေ စိုးမိုးရေးတပ်ဖွဲ့က နမ့်ခမ်းဆေးရုံသို့ ကူညီပို့ဆောင်ပေးထားတယ်လို့ သိရပါတယ်။
ဦးမောင်ဦး ရိုက်နှက်ခံရတာနဲ့ ပတ်သက်ပြီး TNLA ရဲ့ တရားဥပဒေစိုးမိုးရေးတပ်ဖွဲ့က စုံစမ်းစစ်ဆေးမှု ပြုလုပ်နေတယ်လို့ ဆိုပါတယ်။
ပြီးခဲ့တဲ့ ၂၀၂၄ ဩဂုတ် ၂၈ ရက်မှာလည်း နမ့်ခမ်းမြို့နယ် မန်တပ်ရွာခံနှစ်ဦးဟာ စစ်ကောင်စီတပ်နဲ့ ပတ်သက်မှု ရှိတယ်ဆိုပြီး KIA က ဖမ်းဆီးရိုက်နှက်ခဲ့တဲ့ဖြစ်စဉ်လည်း ဖြစ်ပွားခဲ့ဖူးပါတယ်။
