မိုင်းရူပ၊ ဇန်နဝါရီ ၁၇ ရက်၊ လားရှိုး
ရှမ်းမြောက် လားရှိုးမြို့ ရပ်ကွက်(၄)ရှိ မဟာဗောဓာရုံ ကျောင်းတိုက်အတွင်းက ဓမ္မာရုံတစ်ခု မီးလောင်မှု ဖြစ်ပွားခဲ့ပါတယ်။
ဒီနေ့ ဇန်နဝါရီ ၁၇ ရက် နေ့လယ် ၃ နာရီ ၄၅ မိနစ်မှာ ဝါယာကြိုး ရှော့လ်ဖြစ်ရာကနေတဆင့် ကျောင်းဓမ္မာရုံ မီးလောင်မှု ဖြစ်ပွားခဲ့တာလို့ ဖြစ်စဥ်ကို သိရှိတဲ့ လားရှိုးဒေသခံတစ်ဦးက ပြောပါတယ်။
“အများကတော့ ဝါယာရှော့လ်ကြောင့်လို့ ပြောကြတယ်။ ဒီရက်ပိုင်း အဲဘက်ကို မီးပေးနေတာ။ ဓမ္မာရုံတစ်ခုဘဲ လောင်တာ။ ကျန်တာတော့ မလောင်ဘူး”
မီးလောင်မှုကြောင့် ကိုးကန့်တပ်မတော်- MNDAA ရဲ့ မီးသတ်ဌာနက နာရီဝက်ကြာ မီးငြိမ်းသတ်ခဲ့ရပြီး ဆုံးရှုံးမှု တန်ဖိုးကိုတော့ မသိရသေးပါဘူး။
ပြီးခဲ့တဲ့ ဇန်နဝါရီ ၁၅ ရက်မှာလည်း ရှမ်းမြောက် မိုင်းရယ်မြို့နယ် ကုန်းနင်းကျေးရွာမှာ ဘက်ထရီအိုး ပေါက်ကွဲပြီး မီးလောင်မှု ဖြစ်ပွားခဲ့ရာ လသားကလေးငယ်တစ်ဦးနဲ့ ၂ နှစ်အရွယ် ကလေးငယ်တစ်ဦး သေဆုံးခဲ့ပါတယ်။
ပြီးခဲ့တဲ့ ဇန်နဝါရီ ၉ ရက်ကလည်း ရှမ်းမြောက် နမ့်ခမ်းမြို့နယ် နမ့်စိတ်ရွာမှာ အိမ်ရှင်ဖြစ်သူက အသုဘ သွားနေစဉ် ဝိုင်ယာကြိုး ရှော့လ်ဖြစ်ပြီး မီးလောင်မှု ဖြစ်ပွားခဲ့ပါတယ်။
