မိုင်းရူပ၊ ဒီဇင်ဘာ ၉ ရက်၊ လားရှိုး
တရုတ်အကူအညီနဲ့ စစ်ကောင်စီတပ်ပြန်ရခဲ့တဲ့ ရှမ်းမြောက် လားရှိုးမြို့အတွင်း အသံတိတ်သပိတ်မှာ ပါဝင်ဖို့ တိုက်တွန်းကြောင်း လားရှိုးမြို့ရှိ စစ်အာဏာရှင်ဆန့်ကျင်ရေးမှာ ပါဝင်တဲ့ တက်ကြွလှုပ်ရှားသူတွေက ရွှေဖီမြေကို ပြောပါတယ်။
မနက်ဖြန် ဒီဇင်ဘာ ၁၀ ရက်မှာ ကျရောက်မယ့် အပြည်ပြည်ဆိုင်ရာလူအခွင့်အရေးနေ့မှာ နိုင်ငံတဝန်းရှိ လူထုတွေအနေနဲ့ မနက် ၁၀ နာရီကနေ ညနေ ၃ နာရီအထိ အပြင်မထွက်အသံတိတ်သပိတ်မှာ ပါဝင်ဖို့ သပိတ်အင်အားစုတွေနဲ့ စစ်အာဏာရှင်ဆန့်ကျင်ရေးမှာ ပါဝင်သူတွေက တိုက်တွန်းထားတာ ဖြစ်ပါတယ်။
လားရှိုးမြို့မှာလည်း မနက်ဖြန်ဒီဇင်ဘာ ၁၀ ရက်မှာ လူထုတွေအနေနဲ့ မနက် ၁၀ နာရီကနေ ညနေ ၃ နာရီအထိ အပြင်မထွက်ကြဖို့ တက်ကြွလှုပ်ရှားသူတွေလိုက်လံစည်းရုံးတာတွေရှိနေပြီး ဒီလှုပ်ရှားမှုမှာ လူထုတွေပါဝင်ဖို့ တိုက်တွန်းကြောင်း လားရှိုးမြို့ရှိ စစ်အာဏာရှင်ဆန့်ကျင်ရေးမှာ ပါဝင်သူတစ်ဦးက ပြောပါတယ်။
“ကျနော်တို့လည်း မြို့ထဲမှာ လိုက်ဆော်သြနေတာ။ စစ်ကောင်စီက အသံတိတ်သပိတ်ကို တအားကြောက်နေတာ။ မနက် ၁၀ နာရီကနေ ညနေ ၃ နာရီအထိအပြင်မထွက်ကြဖို့ တိုက်တွန်းလိုပါတယ်။ စကစဘက်ကလည်း ဒီသပိတ်ကို တုန့်ပြန်ဖို့ လားရှိုးမြို့မှာ လူတွေစည်ကားနေတဲ့ ပုံစံမျိုး ပြချင်နေတာ” လို့ ဆိုပါတယ်။
ကိုးကန့်တပ်ထိန်းချုပ်ထားတဲ့ လားရှိုးမြို့ကို စစ်ကောင်စီက တရုတ်အကူအညီနဲ့ ပြီးခဲ့တဲ့ ဧပြီလထဲမှာ ပြန်ရခဲ့ပြီး ၎င်းတို့အုပ်ချုပ်ရေးယန္တရားနဲ့ ပြန်လည်ပတ်နေတာ ဖြစ်ပါတယ်။
ရန်ကုန်နဲ့ မန္တလေးမြို့ကြီးတွေမှာ သပိတ်အင်အားစုတွေရဲ့ အသံတိတ်သပိတ်ကို ပြန်လည်တုန့်ပြန်ဖို့ စစ်ကောင်စီရဲ့ ရွေးကောက်ပွဲမှာ ပါဝင်ယှဥ်ပြိုင်မယ့် နိုင်ငံရေးပါတီတချို့က မဲဆွယ်စည်းရုံးတွေအကြီးအကျယ်ပြုလုပ်ဖို့ ပြင်ဆင်ထားတဲ့ သတင်းတွေ ထွက်ပေါ်နေပါတယ်။
သပိတ်အင်အားစုတွေနဲ့ တော်လှန်ရေးအင်အားစုတွေကတော့ ဒီလှုပ်ရှားမှုကို တစ်နိုင်ငံလုံးအတိုင်းအတာနဲ့ လူထုတွေပါဝင်ကြဖို့ တိုက်တွန်းထားကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
