မိုင်းရူပ၊ ဒီဇင်ဘာ ၃ ရက်၊ ကျောက်မဲ
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် ကျောက်မဲမြို့မှာ တော်လှန်ရေးတပ်တွေနဲ့ ဆက်စပ်မှုရှိတယ်ဆိုပြီး စစ်ကောင်စီတပ်က နေအိမ်ဆက်တိုက်ချိတ်ပိတ်တာတွေ ပြုလုပ်နေတယ်လို့ မြို့ခံတွေက ရွှေဖီမြေကို ပြောပါတယ်။
ပြီးခဲ့တဲ့ နိုဝင်ဘာနောက်ဆုံးအပတ်မှာ ရပ်ကွက် ၉ မှာနေထိုင်တဲ့ ကိုအေးမောင်ဆိုသူနဲ့ သီဟိုဟ်ကျောင်းအနီးမှာ နေထိုင်တဲ့ ကိုလှကျော်ဆိုသူ ၂ ဦးကို တော်လှန်ရေးတပ်တွေနဲ့ ဆက်စပ်မှုရှိတယ်ပြီး စစ်ကောင်စီက ဖမ်းဆီးထားတယ်လို့ ဆိုပါတယ်။
ဒါ့အပြင် နေအိမ်တချို့ကိုလည်း စစ်ကောင်စီတပ်ကဆက်တိုက်ချိတ်ပိတ်နေပြီး ချိတ်ပိတ်ခံရတဲ့နေအိမ်တွေကို တအာင်းတပ်မတော်- TNLA နဲ့ ဆက်စပ်မှုရှိကြောင်း ဖော်ပြမထားဘဲ ပြည်သူ့ကာကွယ်ရေးတပ်-PDF တွေနဲ့ ဆက်စပ်မှုရှိတယ်ဆိုပြီး ရေသားထားတယ်လို့ ကျောက်မဲမြို့ခံတစ်ဦးက ရွှေဖီမြေကို ပြောပါတယ်။
“ကိုလှကျော်က အရင်ဖမ်းခံရတယ်။ ကိုအေးမောင်ကျတော့ သူကအမေအိုကို စောင့်ရှောက်နေတာ။ PDF နဲ့ တော့ ပတ်သတ်မှုမရှိဘူးလို့ ကြားတယ်။ TNLA နဲ့ ကျတော့ ဘယ်လို ပတ်သတ်မှုရှိလဲတော့ မသိဘူး” လို့ဆိုပါတယ်။
ဒါ့အပြင် ကျောက်မဲမြို့ကို TNLA အုပ်ချုပ်စဥ် အုပ်ချုပ်ရေးမှူးလုပ်ခဲ့တဲ့သူတွေကို စစ်ကောင်စီက ခေါ်ယူစစ်ဆေးတာတွေပြုလုပ်နေပြီး တချို့ကို ရိုက်နှက်စစ်ဆေးတာတွေ ပြုလုပ်ခဲ့တယ်လို့ ၎င်းကဆက်ပြောပါတယ်။
စစ်ကောင်စီတပ်ဟာ ပြီးခဲ့တဲ့အောက်တိုဘာနောက် ဆုံးအပတ်ကစပြီး ကျောက်မဲမြို့တွင်းက နေအိမ်တွေကို တော်လှန်ရေးတပ်တွေနဲ့ ဆက်စပ်မှုရှိတယ်ဆိုပြီး ချိတ်ပိတ်တာတွေ ပြုလုပ်နေတာ ဖြစ်ပါတယ်။
ရွှေဖီမြေက ရရှိထားတဲ့စာရင်းအရ ကျောက်မဲမြို့မှာ ချိတ်ပိတ်ခံရတဲ့ နေအိမ်ဆယ်နဲ့ချီရှိနေပြီး ဖမ်းဆီးရခံသူ ၁၀ ဦးထက်မနည်း ရှိခဲ့ပါတယ်။
စစ်ကောင်စီတပ်ပြန်ထိန်းချုပ်ထားတဲ့ သီပေါနဲ့ နောင်ချိုမြို့မှာလည်း စစ်ကောင်စီက ချိတ်ပိတ်ထားပြီး မြို့ခံတချို့ ဖမ်းဆီးထားခဲ့တယ်လို့ ဒေသခံတွေက ရွှေဖီမြေကို ပြောဆိုထားပါတယ်။
တအာင်းတပ်ထိန်းချုပ်ခဲ့တဲ့ နောင်ချို၊ ကျောက်မဲနဲ့ သီပေါမြို့ကို ပြီးခဲ့တဲ့ ဇူလိုင်နဲ့ အောက်တိုဘာလထဲမှာ စစ်ကောင်စီက ပြန်လည်သိမ်းယူနိုင်ခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
