မိုင်းရူပ၊ နိုဝင်ဘာ ၂၉ ရက်၊ ကျောက်မဲ
ရှမ်းမြောက် ကျောက်မဲမြို့နယ် ပုံဝိုးကျေးရွာမှာ စစ်ကောင်စီတပ်နဲ့ ရှမ်းပြည်တိုးတက်ရေးပါတီ SSPP တို့အကြား တိုက်ပွဲဖြစ်ပွားခဲ့တယ်လို့ SSPP ဘက်က ဒီနေ့မှာ ထုတ်ပြန်ပါတယ်။
ဒီနေ့ နိုဝင်ဘာ ၂၉ ရက် နေ့လည် ၁ နာရီဝန်းကျင်ကစပြီး အင်အား ၁၀၀ ဝန်းကျင်ရှိတဲ့ စစ်ကောင်စီ စစ်ကြောင်းဟာ SSPP တပ်တည်ရှိရာကို ထိုးစစ်ဆင် တိုက်ခိုက်လာတာကြောင့် နေ့လည် ၃ နာရီဝန်းကျင်အထိ တိုက်ပွဲတွေ ဆက်ဖြစ်နေတယ်လို့ ဆိုပါတယ်။
ဒါ့အပြင် တိုက်ပွဲအတွင်း စစ်ကောင်စီတပ်ဘက်က မြေပြင်စစ်ကြောင်းအပြင် ဒရုန်းတိုက်ခိုက်မှုတွေပါ အသုံးပြုခဲ့တယ်လို့ SSPP ရဲ့ ထုတ်ပြန်ချက်ထဲ ဖော်ပြထားပါတယ်။
ပုံဝိုးကျေးရွာဟာ ကျောက်မဲမြို့နယ်နဲ့ ရှမ်းတောင် ရပ်စောက်မြို့နယ်ဘက်သွားတဲ့ လမ်းပေါ်မှာ တည်ရှိပြီး ကျောက်မဲမြို့ကို တအာင်းတပ်မတော် TNLA ထိန်းချုပ်စဥ် နောင်ပိန်၊ ပုံဝိုးတကျောကို SSPP တပ်က ထိန်းချုပ်ထားတာဖြစ်ပါတယ်။
လက်ရှိမှာ စစ်ကောင်စီက ကျောက်မဲမြို့ကို ပြန်ရပြီးနောက် အရင်က SSPP အခြေချ တပ်စွဲထားတဲ့ နောင်ပိန်ကျေးရွာကို အုပ်ချုပ်ခွင့် မပေးတာကြောင့် နှစ်ဖက်တပ်တွေ စစ်ရေးတင်းမာမှု ဖြစ်နေတာလို့ နောင်ပိန်ရွာခံတစ်ဦးက ရွှေဖီမြေကို ပြောပါတယ်။
“စကစက ရဲရွာမှာ စခန်းချတဲ့ SSPP တွေကို တပ်ရွေ့ခိုင်းတာ။ SSPP က မရွေ့ဘူး။ နောင်ပိန်လည်း SSPP က အုပ်ချုပ်ခွင့် ပြန်တောင်းတာ စကစဘက်က မပေးဘူး။ အခု SSPP က နောင်ပိန်တကျောမှာ စစ်ကောက်နေတာ” လို့ ဆိုပါတယ်။
ဒါ့အပြင် SSPP ထိန်းချုပ်ထားတဲ့ အထက်ရဲရွာအပါအဝင် တောင်ခြေရွာတွေမှာ ကျားဖြန်အွန်လိုင်း ငွေလိမ်ဂိုဏ်းတွေ ရှိနေပြီး စစ်ကောင်စီဘက်က ကျားဖြန်ဂိုဏ်းတွေ ဖမ်းဆီးဖို့ ကြိုးစားနေတာကြောင့် တိုက်ပွဲဖြစ်ပွားတာလို့လည်း သတင်းတွေ ထွက်ပေါ်နေပါတယ်။
“ရဲရွာဘက်မှာ ကျားဖြန်ရုံရှိတယ်။ အရင်ကတည်းလည်း ကြားတယ်။ TNLA ကျောက်မဲမြို့ကို ထိန်းတုန်းက နောင်ပိန်တကျောက SSPP အပိုင်ပေါ့။ အခု စကစ ပြန်ရတော့ SSPP ကို ပေးမအုပ်ချုပ်ဘဲ အင်အားလျော့ခိုင်းတဲ့ သဘောပေါ့” လို့ ၎င်းက ဆက်ပြောပါတယ်။
SSPP ထိန်းချုပ်ထားတဲ့ အထက်ရဲရွာနဲ့ တောင်ခြေကျေးရွာအပါအဝင် နောင်ပိန်တကျောမှာ ကျားဖြန်ရုံတွေရှိနေတာလို့ ထွက်ပေါ်နေတဲ့သတင်းနဲ့ ပတ်သက်ပြီး တုန့်ပြန်ချက်ရဖို့ SSPP ရဲ့ ပြောရေးဆိုခွင့်ရှိသူတွေကို ရွှေဖီမြေက ဆက်သွယ်မေးမြန်းနေဆဲ ဖြစ်ပါတယ်။
ပြီးခဲ့တဲ့ နိုဝင်ဘာ ၁၃ ရက်က SSPP ရဲ့ ထုတ်ပြန်ချက်မှာတော့ SSPP ထိန်းချုပ်နယ်မြေမှာ အွန်လိုင်းငွေလိမ်ဂိုဏ်းတွေ မရှိစေရေး အထူးကြပ်မတ် ဆောင်ရွက်သွားမယ်လို့ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
