မိုင်းရူပ၊ နိုဝင်ဘာ ၂၄ ရက်၊ လားရှိုး
ကိုးကန့်တပ်မတော်- MNDAA တပ်တွေ ဆုတ်ခွာနေတယ်လို့ သတင်းထွက်နေတဲ့ လားရှိုးမြို့ပြင်ရှိ ကိုးကန့်တပ်ဟာ တပ်ဆုတ်တာ မရှိဘဲ အုပ်ချုပ်ရေးလုပ်ငန်း ပုံမှန်လည်ပတ်နေတယ်လို့ ဒေသခံတွေက ရွှေဖီမြေကို ပြောပါတယ်။
လားရှိုးမြို့နယ် ဟိုယ၊ နမ့်ပေါင်၊ မယ်ဟန်နဲ့ နောင်မွန် စတဲ့ကျေးရွာတွေမှာ MNDAA ရဲ့ အုပ်ချုပ်ရေးလုပ်ငန်းတွေ ပုံမှန်လည်ပတ်နေပြီး ဆိုင်အခွန်တွေလည်း ပြန်ကောက်နေတယ်လို့ လားရှိုးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“အခုထိ တပ်ဆုတ်တာ မရှိပါဘူး။ ဆိုင်အခွန်တွေတောင် ကောက်ဖို့ လုပ်နေတာ။ ကြားရသလောက်တော့ ကိုးကန့်က ဆုတ်ဖို့မရှိဘူး။ ကျနော့်ညီလည်း နမ့်ပေါင်မှာ ဈေးရောင်းနေတာ”
ပြီးခဲ့တဲ့ နိုဝင်ဘာ ၁၁ ရက်က လားရှိုးမြို့မှာ MNDAA နဲ့ စစ်တပ်တို့ တွေ့ဆုံခဲ့ပြီး စစ်ကောင်စီတပ်ဘက်က တပ်ဆုတ်ခိုင်းတာကို ကိုးကန့်တပ်က လက်မခံဘဲ စစ်ကောင်စီရဲ့ စစ်သုံ့ပန်း ၂၀၀ ကျော်ကိုသာ ပြန်လွှတ်ပေးခဲ့တယ်လို့ သိရပါတယ်။
စစ်ကောင်စီရဲ့ တပ်ဆုတ်ခိုင်းမှုကြောင့် လားရှိုမြို့ပြင်မှာ ကိုးကန့်တပ်နဲ့ စစ်တပ်တို့အကြား စစ်ရေးတင်းမာမှု ဖြစ်ပွားခဲ့ပြီး သီပေါတံတားကိုလည်း နှစ်ဖက်တပ် အပြန်အလှန်ပိတ်ထားပြီး ဒီနေ့ နိုဝင်ဘာ ၂၄ ရက်အထိ ပြန်လည်ဖွင့်လှစ်ပေးတာ မရှိသေးပါဘူး။
လားရှိုးမြို့ပြင်က အခြေအနေတွေနဲ့ ပတ်သက်ပြီး စစ်ကောင်စီနဲ့ကိုးကန့်တပ်ဘက်ကတော့ တစုံတရာ သတင်းထုတ်ပြန်ထားတာ မရှိသေးပါဘူး။
လက်ရှိမှာ စစ်တပ်က လားရှိုးမြို့ပေါ်ကိုသာ ထိန်းချုပ်ထားပြီး အရေးပါတဲ့ သီပေါ-လားရှိုး လမ်းပိုင်းကိုတော့ ကိုးကန့်တပ်ကဘဲ ထိန်းချုပ်ထားတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
