မိုင်းရူပ၊ နိုဝင်ဘာ ၁၉ ရက်၊ သပိတ်ကျင်း
မန္တလေး PDF ထိန်းချုပ်ထားတဲ့ မန္တလေးတိုင်း သပိတ်ကျင်းမြို့နယ် လက်ပံပြန့်ကျေးရွာကို စစ်ကောင်စီတပ် ဗုံးကြဲလို့ အရပ်သား ၂ ဦး သေဆုံးပြီး ၃ ဦး ဒဏ်ရာပြင်းထန်ခဲ့တယ်လို့ မန္တလေး PDF က ထုတ်ပြန်ပါတယ်။
လက်ပံပြန့်ကျေးရွာကို စစ်ကောင်စီက ဒီနေ့ နိုဝင်ဘာ ၁၉ ရက် ညနေ ၄ နာရီခွဲမှာ ဂျက်လေယာဉ်နဲ့ တိုက်ပွဲမရှိဘဲ ဗုံးကြဲတိုက်ခိုက်ခဲ့တာဖြစ်တယ်လို့ ဆိုပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် အဆောက်အအုံတချို့ ပျက်စီးခဲ့ပြီး သေဆုံးသူနဲ့ ဒဏ်ရာရသူတွေထဲမှာ အမျိုးသား၊ အမျိုးသမီး အတိအကျကိုတော့ မသိရသေးပါဘူး။
လက်ရှိ သပိတ်ကျင်းမြို့နယ် ဖော့တော့လမ်းဆုံအနီးမှာ စစ်ကောင်စီနဲ့ တော်လှန်ရေးတပ်တွေအကြား တိုက်ပွဲဖြစ်ပွားနေပြီး စစ်ကောင်စီတပ်ဘက်က လေကြောင်းတိုက်ခိုက်မှုအပြင် ဒရုန်းတိုက်ခိုက်မှုတွေပါ ပြုလုပ်နေတယ်လို့ မြေပြင်သတင်းအရင်းမြစ်တစ်ဦးက ရွှေဖီမြေကို ပြောပါတယ်။
“သပိတ်ကျင်းဘက်မှာ တိုက်ပွဲက အပြင်းအထန်မဟုတ်ပေမဲ့ လက်နက်ကြီး၊ ဒရုန်းကတော့ ပုံမှန်လို တိုက်ခိုက်နေတာ။ တိုက်ပွဲလည်း အနည်းငယ်တော့ ဖြစ်တယ်”
စစ်ကောင်စီတပ်ဟာ တော်လှန်ရေးတပ်တွေ ထိန်းချုပ်ထားတဲ့ စဥ့်ကူးမြို့နယ်အပါအဝင် သပိတ်ကျင်း၊ မတ္တရာမြို့နယ်ထဲကို ထိုးစစ်ဆင်မှုတွေ ဆက်တိုင်လုပ်ဆောင်နေသလို လေယာဉ်နဲ့ ဗုံးကြဲတိုက်ခိုက်တာတွေကိုလည်း ဆက်တိုက် ပြုလုပ်နေပါတယ်။
ပြီးခဲ့တဲ့ နိုဝင်ဘာ ၁၂ ရက်မှာလည်း စဥ့်ကူးမြို့နယ် မာလဲရွာ စာသင်ကျောင်းကို စစ်ကောင်စီက ဗုံးကြဲတိုက်ခိုက်လို့ အရပ်သား ၅ ဦး သေဆုံးပြီး ၅ ဦး ဒဏ်ရာရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
