ပျားကြီး၊ အောက်တိုဘာ ၂၈ ရက်၊ တောင်ကြီး
ရှမ်းတောင် တောင်ကြီးမြို့မှာ ပြုလုပ်ဖို့ရှိတဲ့ တန်ဆောင်တိုင် မီးပုံးပျံပွဲအတွက် ယမ်း စမ်းသပ်မှုတွေ ပြုလုပ်နေချိန်မှာ ရုတ်တရက် ပေါက်ကွဲမှု ဖြစ်ပွားခဲ့တာကြောင့် အမျိုးသမီးတစ်ဦး သေဆုံးခဲ့တယ်လို့ ဒေသခံတွေက ရွှေဖီမြေကို အတည်ပြုပြောဆိုပါတယ်။
ဒီနေ့ အောက်တိုဘာ ၂၈ ရက် မနက်ပိုင်းက တောင်ကြီးမြို့နယ်၊ ဖာမွန်းကျေးရွာက နေအိမ်တစ်လုံးမှာ မီးပုံးပျံမှာ အသုံးပြုမယ့်ယမ်းတွေ စမ်းသပ်နေတဲ့အချိန် ပေါက်ကွဲခဲ့တာဖြစ်ပါတယ်။
“ပေါက်ကွဲတော့ အဲ့ဒီအိမ်နားမှာရှိတဲ့ ကွမ်းယာဆိုင်ကအမျိုးသမီးကိုမှန်ပြီး မီးလောင်ကုန်တာပေါ့။ ဆေးရုံတောင်မပို့လိုက်ရဘူး။ နေရာတင်ဆုံးတာ။ ကျန်တဲ့ဒဏ်ရာရတဲ့သူတွေတော့ စဝ်စံထွန်းဆေးရုံကိုပို့လိုက်ပြီ”လို့ တောင်ကြီးမြို့ခံပရဟိတအသင်းသားတစ်ဦးကပြောပါတယ်။
ယမ်းမတော်တဆမှုကြောင့် နေအိမ်တစ်လုံးမီးလောင်ခဲ့ပြီးအမျိုးသား ၂ ဦးလည်းမီးလောင်ဒဏ်ရာတွေရရှိခဲ့တယ်လို့ ဒေသခံတွေကဆိုပါတယ်။
တောင်ကြီးတန်ဆောင်တိုင်မီးပုံးပျံပွဲမှာ အခုလိုယမ်းမတော်တဆပေါက်ကွဲမှုတွေကြောင့် လူသေဆုံးမှုနဲ့ မီးလောင်မှုတွေဟာနှစ်စဥ်နီးပါးရှိခဲ့ပြီး အနီးစပ်ဆုံးအနေနဲ့ ပြီးခဲ့တဲ့နှစ်ကလည်း အခုလိုယမ်းမတော်တဆမှုကြောင့် လူ ၃ ဦးသေဆုံးခဲ့ရတယ်လို့ ဒေသခံတွေကပြောပါတယ်။
မနက်ဖြန် အောက်တိုဘာလ ၂၉ ရက်နေ့ကနေ နိုဝင်ဘာလ ၄ ရက်နေ့အထိကျင်းပမယ့် တန်ဆောင်တိုင်မီးပုံးပျံပွဲကို အရင်နှစ်တွေကထက် ပိုပြီးစည်ကားအောင် စစ်ကောင်စီဖက်က စီစဥ်နေပြီး ညမီးကြီးမီးပုံးပျံ ၄၃ လုံး၊ စိန်နားပန် ၃၇ လုံးအပါအဝင် မီးပုံးပျံစုစုပေါင်း ၄၃၈ လုံးဝင်ရောက်ယှဥ်ပြိုင်ဖို့စာရင်းပေးထားတယ်လို့ ပွဲတော်ကျင်းပရေးကော်မတီက ထုတ်ပြန်ထားတာတွေ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
