မိုင်းရူပ၊ အောက်တိုဘာ ၂၇ ရက်၊ လားရှိုး
စစ်ကောင်စီ ပြန်လည်ထိန်းချုပ်တဲ့ ရှမ်းမြောက် လားရှိုးမြို့ ရပ်ကွက်(၇)ရှိ အခြေခံပညာ အထက်တန်းကျောင်း အမှတ်(၂)အနီးမှာ မူးယစ်ဆေးကြောင်ပြီး မောင်းနှင်လာတဲ့ ကားတစ်စီးက ကားနဲ့ ဆိုင်ကယ်တွေကို တိုက်မိလို့ ၂ ဦး ဒဏ်ရာအပြင်းအထန် ရခဲ့တယ်လို့ ရွှေဖီမြေက စုံစမ်းသိရှိရပါတယ်။
မနေ့ အောက်တိုဘာ (၂၆) ရက် ညနေ (၆) နာရီခွဲဝန်းကျင်မှာ မူးယစ်ဆေးကြောင်ပြီး Crown ကားတစ်စီး မောင်းနှင်လာတဲ့ အမျိုးသားတစ်ဦးက Alphard ကားတိုက်ပြီးနောက် ဆိုင်ကယ်စီးနှင်လာသူတွေကို ပြန်တိုက်မိခဲ့တာဖြစ်တယ်လို့ အခင်းဖြစ်ပွားစဉ် မြင်တွေ့ခဲ့သူ အမျိုးသားတစ်ဦးက “ရွှေဖီမြေ” ကို ပြောပါတယ်။
“Crown ကားက Alphard ကို အရင်တိုက်ပြီးမှ ဆိုင်ကယ်တွေကို ပြန်တိုက်တာ။ မောင်းလာတဲ့ကောင်က ယာမကွဲနေတာ။ ဒဏ်ရာတာ ၂ ယောက်ပဲ။ ကလေးမက အခု သတိပြန်ရပြီ။ ကျန်တစ်ယောက်ကတော့ ဒဏ်ရာ တော်တော်ပြင်းထန်တယ်။ အသေအပျောက်တော့ မရှိဘူး” လို့ ဆိုပါတယ်။
ကားနဲ့ ဆိုင်ကယ်တိုက်မိတဲ့ အမျိုးသားကိုတော့ ရဲတပ်ဖွဲ့က ဖမ်းဆီးထားပြီး ဒဏ်ရာရသူ ၂ ဦးဟာ အမျိုးသားတစ်ဦးနဲ့ အမျိုးသမီးတစ်ဦး ဖြစ်တယ်လို့ သူက ဆက်ပြောပါတယ်။
ပြီးခဲ့တဲ့ အောက်တိုဘာ (၂၄) ရက်မှာလည်း ရှမ်းမြောက် ကွတ်ခိုင်မြို့နယ် နမ့်ဖတ်ကာကျေးရွာမှာ ကားတစ်စီး တိမ်းမှောက်ပြီး အမျိုးသားတစ်ဦး ထိခိုက်ဒဏ်ရာရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
