လွေးဇွန်မိုး၊ အောက်တိုဘာ ၂၁ ရက်၊ ကျောက်မဲ
ရှမ်းမြောက် လားရှိုးမြို့ပေါ်သို့ စစ်ဘေးရှောင်လာတဲ့ ကျောက်မဲမြို့နယ်က စစ်ဘေးရှောင်တွေကို နေရပ်ပြန်ပို့တဲ့ ပရဟိတကားက မတော်တဆဖြစ်ပြီး ကားထဲလိုက်ပါလာသူတချို့ ထိခိုက်ဒဏ်ရာရခဲ့တယ်လို့ သိရပါတယ်။
မနေ့ အောက်တိုဘာလ ၂၀ ရက်မှာ စစ်ရှောင် ၃ ဦး အပါအဝင် လူ ၆ ဦး လိုက်ပါလာတဲ့ ကားဟာ နောင်ကွဲရွာအနီးမှာပဲ ကားမတော်တဆမှုဖြစ်ပြီး ဇာတိမြေကျောက်မဲ စစ်ဘေးရှောင်ပြန်ပို့ပေးရေးတာဝန်ခံနဲ့ ၎င်းရဲ့ အမျိုးသားဖြစ်သူ ဒဏ်ရာရခဲ့ပြီး ကျန်တဲ့ ၄ ဦးကတော့ ဘေးကင်းခဲ့တယ်လို့ ဖြစ်စဥ်သိရှိသူ အမျိုးသမီးတစ်ဦးက ပြောပါတယ်။
“၁၂ ဘီးကို ကျော်တက်ရင်း မနိုင်တော့တာ။ အရှိန်များပြီး။ ကားမောင်းတဲ့ ဆရာမကတော့ နည်းနည်းကိုယ်လက်နာကျင်တာကလွဲရင် ဘာမှမဖြစ်ပါဘူး။ ကားပေါ်ပါလာတဲ့ စစ်ရှောင်ပြည်သူ ကလေးငယ်လေးနှစ်ယောက်နဲ့ အဖွားဖြစ်သူ ဘေးကင်းပါတယ်”
ဇာတိမြေ ပရဟိတအသင်းဟာ လားရှိုးမြို့ကို စစ်ဘေးရှောင်လာပြီး နေရပ်မပြန်နိုင်သေးတဲ့ ကျောက်မဲ နောင်ပိန်က စစ်ရှောင်တွေကို အခမဲ့ နေရပ်ပြန်ပို့ပေးနေတာဖြစ်ပြီး ဒေသခံ ၃၀၀ ကျော်ကို နေရပ်ပြန်ပို့ပေးနိုင်ခဲ့တယ်လို့ ဆိုပါတယ်။
တအာင်းတပ်မတော် (TNLA) ထိန်းချုပ်ထားတဲ့ ကျောက်မဲမြို့ကို ပြီးခဲ့တဲ့ အောက်တိုဘာ ၁ ရက်မှာ စစ်ကောင်စီတပ်က ပြန်လည်သိမ်းယူခဲ့ပြီးနောက် လားရှိုးကို စစ်ရှောင်လာခဲ့ကြတဲ့ ကျောက်မဲစစ်ရှောင်တွေက နေရပ်ပြန်လာကြတာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
