ပို့လဘား၊ အောက်တိုဘာ ၂၀ ရက်၊ မိုင်းငေါ့
တအာင်းတပ် ထိန်းချုပ်ထားတဲ့ မိုင်းငေါ့မြို့ကို စစ်ကောင်စီတပ်က လေယာဉ်နဲ့ ထပ်မံ ဗုံးကြဲတိုက်ခိုက်ခဲ့တယ်လို့ ဒေသခံတစ်ဦးက ပြောပါတယ်။
ဒီနေ့ အောက်တိုဘာ ၂၀ ရက် ည ၈ နာရီဝန်းကျင်မှာ စစ်ကောင်စီတပ်က မိုင်းငေါ့မြို့ထဲကို လေယာဉ်နဲ့ ဗုံး ၂ လုံးကြဲချတိုက်ခိုက်ခဲ့တာ ဖြစ်ပါတယ်။
” ဈေးတန်းမှာ ၂ လုံးလာချတာ။ တစ်လုံးက မကွဲဘူး။ တစ်လုံးကကွဲပြီး မီးလောင်နေတာ။ မကွဲတဲ့တစ်လုံးကို မီးကပြန်စားတော့ ထပ်ကွဲတယ်။ လူထိခိုက်ရှိမရှိတော့ မသိရသေးဘူး” လို့ ပြောပါတယ်။
အဲဒီဗုံးကြဲတိုက်ခိုက်မှုကြောင့် လူထိခိုက် သေဆုံးတာတွေ ရှိမရှိကိုတော့ ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
စစ်ကောင်စီတပ်ဟာ မနေ့ နေ့လည် ၁ နာရီဝန်းကျင်ကစပြီး တအာင်းတပ်ထိန်းချုပ်ထားတဲ့ မန်တုံ၊ နမ့်ဆန်၊ မိုင်းငေါ့နဲ့ မိုးကုတ်မြို့တွေကို နာရီပိုင်းအတွင်း တစ်ပြိုင်နက် ဂျက်လေယာဥ်နဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
တအာင်းတပ်ထိန်းချုပ်ထားတဲ့ဒေသမှာ ၃ ပတ်အတွင်း စစ်ကောင်စီက ဗုံးကြဲတိုက်ခိုက်မှု ၂၇ ကြိမ်ပြုလုပ်ခဲ့ပြီး သေဆုံးသူ ၄၀ နီးပါးနဲ့ ဒဏ်ရာရသူ ၄၀ ကျော်အထိ ရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
