ရွှေဖီမြေ၊ ဇန်နဝါရီ ၁၁ ရက်၊ ကျောက်မဲ
တအာင်းတပ်မတော်- TNLA ထိန်းချုပ်တဲ့ ရှမ်းမြောက် ကျောက်မဲမြို့မှာ မူးယစ်ဆေးဝါး သုံးစွဲသူ ၁၃၁ ဦးကို ပြီးခဲ့တဲ့ ဇန်နဝါရီ ၇ ရက်က ပြန်လွှတ်ပေးလိုက်တယ်လို့ TNLA က ဒီနေ့ ဇန်နဝါရီ ၁၁ ရက်မှာ ထုတ်ပြန်လာပါတယ်။
မူးယစ်ဆေးဝါး တိုက်ဖျက်ရေးအဖွဲ့က ဖမ်းဆီးခဲ့တာဖြစ်ပြီး တချို့ကတော့ သက်ဆိုင်ရာ မိဘကိုယ်တိုင် သားတွေကို အကျင့်စာရိတ္တ ပြုပြင်ပေးဖို့ လာရောက် အပ်နှံပေးတာလည်း ပါဝင်တယ်လို့ ထုတ်ပြန်ချက်ထဲ ဖော်ပြထားပါတယ်။
အကျင့်စာရိတ္တ ပြုပြင်ရေးစခန်းမှာ မူးယစ်ဆေး သုံးစွဲသူတွေကို ၆ လကြာ အကျင့်စာရိတ္တ ပြုပြင်ပေးခဲ့ပြီးနောက် သက်ဆိုင်ရာ မိဘထံ ပြန်လည် အပ်နှံပေးခဲ့တယ်လို့ ဆိုပါတယ်။
မူးယစ်ဆေးဝါး သုံးစွဲသူတွေဟာ ပထမအကြိမ် အကျင့်စာရိတ္တ ပြုပြင်ရေးစခန်းသို့ ပို့ဆောင်ခံရပြီး ၆ လ ပြစ်မှု ခံယူရပြီးတော့ ဒုတိယအကြိမ် ထပ်မံ သုံးစွဲတာရှိရင် ၃ နှစ်ကြာ အကျင့်စာရိတ္တ ပြုပြင်ရေးစခန်းသို့ ပို့ဆောင်ခံရမှာ ဖြစ်ပါတယ်။
၁၀၂၇ စစ်ဆင်ရေး မတိုင်ခင် တအာင်းဒေသအတွင်း မူးယစ်ဆေးဝါး သုံးစွဲသူ များပြီး TNLA ထိန်းချုပ်ပြီးနောက် တရားဥပဒေစိုးမိုးရေးလုပ်ငန်း ဆောင်ရွက်ခဲ့ရာ မူးယစ်ဆေးဝါး ရောင်းဝယ်သုံးစွဲသူကို ထိရောက်စွာ အရေးယူနိုင်ခဲ့တယ်လို့ ဖော်ပြထားပါတယ်။
ဒါပေမဲ့ တအာင်းတပ် ထိန်းချုပ်တဲ့ မြို့နယ်တချို့မှာတော့ ကျေးရွာပိုင်းမှာ မူးယစ်ဆေးဝါး ရောင်းဝယ်သုံးစွဲသူ ပြန်များလာပြီး တအာင်းတပ်ရဲ့ အရာရှိတချို့ကလည်း မူးယစ်ဆေးဝါး သုံးစွဲတာတွေ တွေ့လာရတယ်လို့ ဒေသခံတွေက ရွှေဖီမြေသို့ ပြောဆိုထားဖူးပါတယ်။
ပြီးခဲ့တဲ့ ဇွန်လ ၁၁ ရက်ကလည်း နမ့်ဆန်မြို့မှာ PSLF/TNLA ရဲ့ မူးယစ်ဆေးဝါး တိုက်ဖျက်ရေးအဖွဲ့က မူးယစ်ဆေးဝါး သုံးစွဲသူ ၅၀ ဦးကို အကျင့်စာရိတ္တ ပြုပြင်ပြီး ပြန်လွှတ်ပေးခဲ့ဖူးပါတယ်။
