မိုင်းရူပ၊ အောက်တိုဘာ ၃ ရက်၊ ကျောက်မဲ
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် သီပေါဘက် သွားတဲ့လမ်း ကျောက်မဲ တိုးဂိတ်အနီးမှာ စစ်တပ်နဲ့ တအာင်းတပ်မတော်- TNLA အကြား တိုက်ပွဲ ဆက်ဖြစ်နေတယ်လို့ ဒေသခံတွေက ရွှေဖီမြေကို ပြောပါတယ်။
ဒီနေ့ အောက်တိုဘာ ၃ ရက် မနက်အစောပိုင်းနဲ့ နေ့လယ်ပိုင်းမှာ ကျောက်မဲမြို့ ရပ်ကွက် ၁ အုတ်ကျင်း၊ ရပ်ကွက် ၉ ဘက်မှာ လက်နက်ကြီး ကျရောက်ပေါက်ကွဲခဲ့ပြီး နေအိမ်တချို့နဲ့ ဘုန်းကြီးကျောင်းဆောင် ထိမှန်ပျက်စီးခဲ့ပါတယ်။
“အုတ်ကျင်းက မနက်အစောပိုင်း ၁ နာရီလောက် ကျတာ။ ရပ်ကွက် ၇၊ ရပ်ကွက် ၉ နဲ့ ပြိန်းနင်ဘက် ဒီနေ့ နေ့လယ်ပိုင်းမှာ လက်နက်ကြီး ကျတာ။ လူအထိအခိုက်တော့ မရှိဘူး။ မြို့ပြင်မှာ တိုက်ပွဲသံတွေ ကြားနေရတုန်း။ မြို့ပြင်ဆိုတာ အေးရှားဝေါလ်ဘက်ခြမ်းမှာပါ” လို့ ကျောက်မဲမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
လူမှုကွန်ရက်ပေါ်မှာတော့ ကျောက်မဲမြို့ပေါ် TNLA က ရှော့တိုက်ဒုန်းနဲ့ ပစ်ခတ်တယ်ဆိုပြီး ရေသားဖော်ပြနေကြကာ ဓာတ်ပုံထဲမှာတော့ ၁၂၀ မမ လက်နက်ကြီး ဖြစ်နေတာ တွေ့ရပါတယ်။
ကျောက်မဲမြို့ကို စစ်တပ် ပြန်ထိန်းချုပ်ပြီးနောက် စစ်ကောင်စီရဲ့ ဌာနဆိုင်ရာဝန်ထမ်းတွေ ရောက်လာတဲ့ ဗီဒီယိုဖိုင် အွန်လိုင်းပေါ် ပျံ့နှံ့နေပြီး မြို့ခံအများစုကတော့ နေရပ်သို့ ပြန်မလာနိုင်သေးပါဘူး။
ပြီးခဲ့တဲ့ ၁၀၂၇ စစ်ဆင်ရေး ဒုတိယလှိုင်းအတွင်း ကျောက်မဲမြို့ကို တအာင်းတပ်က တိုက်ခိုက်သိမ်းပိုက်နိုင်ခဲ့ပြီး ၁ နှစ်ကျော်အကြာ ပြီးခဲ့တဲ့ အောက်တိုဘာ ၁ ရက်မှာ စစ်တပ် လက်အောက် ပြန်ရောက်သွားတာပဲ ဖြစ်ပါတယ်။
ကျောက်မဲမြို့ပေါ်ရှိ ဒေသခံတွေရဲ့ နေအိမ်တချို့ကို TNLA နဲ့ ပတ်သက်မှု ရှိတယ်ဆိုပြီး ချိတ်ပိတ်ဖို့ စစ်တပ် ထောက်ခံသူတွေ အွန်လိုင်းပေါ် လှုံ့ဆော်တာတွေ ပြုလုပ်နေတာကို တွေ့ရပါတယ်။
စစ်တပ်ဟာ ကျောက်မဲမြို့ကို ပြန်ထိန်းချုပ်ပြီးနောက် လားရှိုး-မန္တလေး ပြည်ထောင်စု လမ်းမပေါ်မှာရှိတဲ့ သီပေါမြို့ဘက် ဆက်လက် ထိုးစစ်ဆင် တိုက်ခိုက်လာနိုင်တယ်လို့ စစ်ရေး အကဲခတ်တွေက သုံးသပ်ကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
