မြတ်နိုး၊ အောက်တိုဘာ ၃ ရက်၊ ဖားကန့်
ကချင်ပြည်နယ် ဖားကန့်မြို့ ကုဋေမှော်ဘက် ဒီနေ့ အောက်တိုဘာ ၃ ရက်မှာ အရပ်သားတစ်ဦး လက်နက်ကျည်စ ထိမှန်ဒဏ်ရာ ရခဲ့တယ်လို့ ဒေသခံတွေဆီက သိရပါတယ်။
“လုံးခင်း ကုဋေမှော်မှာ စစ်ကောင်စီ ပစ်လိုက်တဲ့ ၄၀ မမလို့ ယူဆရတဲ့ လက်နက်ကြီးစ ထိလို့ အရပ်သား ပြည်သူတစ်ဦး ခေါင်းမှာ ထိမှန်သွားတယ်။ အရေးပေါ် လုံးခင်းကို သယ်သွားတယ်” လို့ ဒေသခံ အမျိုးသားတစ်ဦးက ပြောပါတယ်။
လက်နက်ကျည်စ ထိမှန်ဒဏ်ရာ ရသွားတဲ့ အမျိုးသားက အသက် ၄၀ ခန့်အရွယ်ရှိပြီး ဒီနေ့လယ် ၂ နာရီခန့်က ဖြစ်ပွားခဲ့တာလို့ သူက ပြောပါတယ်။
“တိုက်ပွဲ ဖြစ်ပွားတာတော့ မဟုတ်ဘူး။ လက်နက်ကြီးလား၊ ဒရုန်းလား မသိဘူး ကျကွဲသံ ကြားတယ်” လို့ ဒေသခံ လူငယ်တစ်ဦးက ပြောပါတယ်။
ကုဋေမှော် ခရေစီ လက်ဖက်ရည်ဆိုင်နား ဒရုန်းတွေနဲ့ ချတယ်လို့ ကြားသိရပေမဲ့ အတိအကျ မသိရဘူးလို့ ဆိုပါတယ်။
ဒါ့အပြင် ဒီနေ့မနက် ၉ နာရီခွဲခန့်က ဖားကန့်မြို့နယ် မှော်စီစာရွာ၊ သာယာကုန်းက ကျောက်စိမ်းလုပ်ကွက်မှာ လက်ကျင် တူးနေချိန် မြေစာ ပြိုကျလာလို့ အမျိုးသားတစ်ဦး သေဆုံးပြီး တစ်ဦးက ပြင်းထန်ဒဏ်ရာ ရရှိခဲ့တယ်လို့ သိရကြောင်း အမျိုးသားတစ်ဦးကလည်း ပြောပါတယ်။
ဒီနေ့မနက်မှာပဲ ဖားကန့် ဆန်းကြွယ် မှော်တောင်းအနီးက ကုမ္ပဏီတစ်ခုရှိ ဘက်ဟိုးတွေကို စစ်တပ်က မီးရှို့လိုက်တယ်လို့ ဆိုပါတယ်။
ဖားကန့်မှာတော့ ပြီးခဲ့တဲ့ မေလကုန်ခန့်ကစ စစ်တပ်နဲ့ KIA ပူးပေါင်းတပ်ဖွဲ့တို့အကြား မကြာခဏ ထိတွေ့တိုက်ပွဲ ဖြစ်ပွားပြီး လက်ရှိအချိန်ထိ စစ်ရေး တင်းမာနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
