ယာရူစိင်၊ အံက်တိုဘာ ဆငည်း 2၊ လာဆေဝ်
ကဝ်အီကဒံပ်တောပ်တကဲ အီကတူႈကငျားနီန် အူအီးက္လာင်းတဖုင်ဆျိုည်ဖီမျေဒါႈ ဒီန်ထိင်ခြဲ တံပ်ကညာအာဏာဆီုက်ဇေဝ်ကဲ ခေဲင်ကီုင်းလာဆေဝ်နီန် ဖုင်ပလိက်ကဲတောႇဟာဝ်းတိုအီး အီအာဝ်ဒေဲႈတိူရ်ႈစြာင်းဆလာက် ကနာည်ပ္လေါည်က်ုန်ရံရ်နီန် ကထဖါ်ႈကလာကဲ ဆူည်ႇဘိုးကဲထာမ်းတာမ်ရိူန်းအောႏ။
ကဲဒါႈ တားဘြောင်ဂါင် ခေဲင်ပယာ်ႈကဲ က္လာင်းဒါႈ ဂါ်ဆိင်မိုႈတိုအီး အီဂေါင်ခေဲင်ဇံင်ကဲ လိုဒိုည်ႇဒေဲႈတိူရ်ႈစြာင်းဆလာက်နီန် တိုအီးကဲအီအာဝ် ဒေဲႈတိူရ်ႈကဲဒိူန်မာ် ဖုင်ပလိက်ကဲ ဒေဲႈတောႇဟာဝ်းပွံတ်ကဲ ခေဲင်ဂါင်အောႏ။
“ ဘည်ဘာည်းအ်ုန် မိုႈပွံတ် အာဝ်တိူရ်ႈအာဝ်ဘိူန်း။ အူကဝ်ဒီန် ဂေါႇမိုႈ အ်ုန်အာဝ်တံန်းတိူရ်ႈ စီပဲန်အ်ုန်အာဝ်ဟာဝ်းတိူရ်ႈဒီႈကော်။ တားဘြောင်ဂါင်ခေဲင်ပယာ်ႈကဲမာ် ဟာဝ်းက္လာင်းပွံတ်တ ဖုင်ပလိက်ကဲ ဒေဲႈတောႇဟာဝ်းအ်ုန်။ အာဝ်မိုႈစိ အ်ုန်အူကဝ်လိူည် ကတူႈထာမ်းရိူန်း။ တိုအီးပေန်ခ္လ ကဲဒိူန်မာ် မိူဝ်ႈအေ့ အီကတူႈဒဲႈ။ အ်ုန်စီဒါႈဂေါႇမိုႈ အ်ုန်အာဝ်တံန်းတိူရ်ႈနီန် စီပဲန်အောအာဝ်ဟာဝ်းတိူရ်ႈ အ်ုန်ဒါႈဘည်ဒီန် တားပလိက်ကဲမာ် ကထာႇဟာဝ်းပွံတ် ကလာအ်ုန်”
ကဝ်အီဒါႈရကႎိုည်နီန် ဆီုပ်က္လာင်းဘိုး တိုအီးကဲအီအာဝ်ဒေဲႈတိူရ်ႈကဲနီန် ဖုင်ပလိက်ကဲ မှာန်းပွံတ်တာမ်ရိူန်းနီန် ယိူဝ်ႇ 5 မှီူန်ရောတ် 2 ဆဲန် တိုအီးကဲအီငျားဒေႎီရ်ဒါႈတကဲမာ် ကတူႈဒိုည်ႇဘည်နဘာည်းကဲအောႏ။
တိုအီးကီုင်းလာဆေဝ်ကဲအူအီး က္လာင်းဒါႈဘိုး “ အ်ုန်မိုႈလိူည်ဆဖော တိုအီးအရာပ်ကဲ ကဲဆိင်တိူရ်ႈမာ်တိူရ်ႈ မိုႈလိူည်ဆဘောကဲဂယ်။ ကနာည်နံင်တိူရ်ႈစြာင်းဆလာက်နီန် တာဘြောင်ဂါင်ခေဲင်ပယာ်ႈကဲ ဟိုက်လေႈအူဂါင်းတအူဂါင်။ အာဝ်တိူရ်ႈအာဝ်ဘိူန်းနီန် အ်ုန်မိုႈပွံတ်အမိင်။ တံပ်ကညာအာဏာဆီုက်ဇေဝ်ကဲ ဘံန်မိုႈကဲတ ထိင်ခြဲနီန် ကဲဒါပွံတ်အာဏာကဲ ရေဲန်ဟောမ်”။
ခည်ကျံရ်ဆဲပ်တဲမ်ဘာ ဆငည်း 29 ဒိူန် ကာ်မ်မဆျှီန် ပ္လေါည်က်ုန်ရံရ် တံပ်ကညာအာဏာဆီုက်ဇေဝ်ကဲ ဒါလော်စပီကာ လွံင်ဒေဆာ်ႈဟိုရ်ခေဲင်ကီုင်း ကနာည်နှာင်းကညာဆလာက်ကဲ ဒေဲႈတိူရ်ႈစြာင်းဆလာက်ကဲနီန် ခေဲင်ဇံင် ပကီုင်းလာဆေဝ်နီန်အောႏ။
ဘိူန်းအယ်နံပ် မိုႈတ ခေဲင်ပါတီကဲအီနံင်လီပ် ကခေ့ကတား ပကီုင်းလာဆေဝ်နီန်မိုႈ ကြံ့ခိုင်ရေးကာည်း ဖွံ့ဖြိုးရေးပါတီ – USDP၊ ရှမ်းနဲ့တိုင်းရင်းသားများ ဒီမိုခရက်တစ်ပါတီ – SNDP ကာည်း ပြည်သူ့ရှေ့ဆောင်ပါတီ – PPP ကဲဂဲနီန်ယာ့်အောႏ။
ကာ်မ်မဆျှီန်က်ုန်ရံရ် တံပ်ကညာအာဏာဆီုက်ဇေဝ်ကဲ ပ္လိူရ်ႈလေႈဒါႈ ဇူႈပွံတ်ကျံရ်ဆဲပ်တီမ်ဘာ ဆငည်း 30ဒိူန် ရောတ်ဘံင်ကျံရ်အံက်တိုဘာ ဆငည်း 14ဒီန် ကဲနံင်က္လံပ်ဟာဝ်း စြာင်းကညာဆလာက်ကဲ ကနာည်ဒေါန် – 1 ပ္လေါည်က်ုန်ရံရ်နီန် ပဇံင်အီကဆီုဝ်ကဆဲင်ကဲအောႏ။
ကာ်မ်မဆျှီန်က်ုန်ရံရ် တံပ်ကညာအာဏာဆီုက်ဇေဝ်ကဲ ပ္လိူရ်ႈလေႈဒါႈ ပ္လေါည်က်ုန်ရံရ် ပ်ုန်နံင်အွံရ်ရေဲန်ဟာဝ်း တံပ်ကညာအာဏာဆီုက်ဇေဝ်ကဲ ဒေါန်အူနီန် ကဲနံင်ဇူႈဒေရေဲန်ဟာဝ်း ဘံန်ကျံရ်ဒီဆဲမ်ဘာ ဆငည်း 28ဒီန် ခေဲင်ကီုင်း 102ကီုင်း ဆဲႈဒါႇဒီန် ကဲနံင်ရေဲန်ဟာဝ်း 3ဒေါန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
