မိုင်းရူပ၊ အောက်တိုဘာ ၁ ရက်၊ ကျောက်မဲ
စစ်ကောင်စီတပ် ထိုးစစ်ဆင် တိုက်ခိုက်နေတဲ့ ရှမ်းမြောက် ကျောက်မဲမြို့အနီးမှာ တိုက်ပွဲ ဆက်လက် ပြင်းထန်နေပြီး တအာင်းတပ်- TNLA ဘက်ကလည်း မြို့တွင်းကနေ ဆုတ်ခွာမှု မရှိသေးဘဲ ဆက်လက် ခုခံနေတယ်လို့ သိရပါတယ်။
“ငြိမ်းချမ်းရေးကုန်းဘက် ထိုးလာတဲ့ စကစ စစ်ကြောင်းက နမ့်ဆော့ကို ရောက်နေတယ်။ ခိုမုန်းဘက်ကနေလည်း ထိုးလာနေတယ်။ တိုက်ပွဲက ဆက်ပြင်းထန်နေတယ်” လို့ ရှေ့တန်းစစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ဒီနေ့ အောက်တိုဘာ ၁ ရက် မနက်ပိုင်းအထိ စစ်ကောင်စီတပ်ဖွဲ့ဝင်က ကျောက်မဲမြို့တွင်းအထိ ရောက်လာပြီလို့ မြေပြင်သတင်းအရင်းအမြစ်တချို့ကပြောပြီး အခြေအနေ အသေးစိတ်ကိုတော့ မသိရသေးပါဘူး။
စစ်ကောင်စီဝါဒဖြန့် တယ်လီဂရမ်ချန်နယ်တွေမှာတော့ ကျောက်မဲမြို့တစ်ခုလုံးကို စစ်ကောင်စီဘက်က ထိန်းချုပ်နိုင်ပြီလို့ ဝါဒဖြန့် ရေးသားဖော်ပြနေကြပါတယ်။
မြို့အနီးရှိ အရင်က စစ်ကောင်စီရဲ့ ခြေမြန်တပ်ရင်း ၅၀၁၊ ၅၀၂ အပါအဝင် စစ်ဆင်ရေး ကွပ်ကဲမှုဌာနချုပ် အမှတ်(၁၂)ကိုတော့ TNLA ဘက်က ဆက်လက် ထိန်းချုပ်ထားဆဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
