မိုင်းရူပ၊ စက်တင်ဘာ ၃၀ ရက်၊ ကျောက်မဲ
ဒီနေ့ စက်တင်ဘာ ၃၀ ရက် နေ့လည်ပိုင်းမှာ စစ်ကောင်စီတပ်ဟာ ကျောက်မဲမြို့တွင်း ထိုးဖောက်ဝင်ရောက်နေပြီး ကျောက်မဲမြို့ထဲ မီးလောင်ဗုံးသုံးပြီး ဗုံးကြဲတိုက်ခိုက်နေတယ်လို့ သိရပါတယ်။
“TNLA မီးရှို့တာ မဟုတ်ဘူး။ စစ်ကောင်စီတွေ ဒရုန်းသုံးပြီး မီးလောင်ဗုံးချနေတာ။ အခုစကစ မြို့ထဲအထိ ထိုးဖောက်ဖို့ လုပ်နေတာ။ TNLA ကလည်း ဆက်လက်ခုခံနေတယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
လူမှုကွန်ယက်ပေါ်မှာတော့ ကျောက်မဲမြို့တွင်းရှိ ဌာနဆိုင်ရာတွေကို တအာင်းတပ်ဘက်က မီးရှို့နေတယ်ဆိုပြီး စစ်ကောင်စီရဲ့ ဝါဒဖြန့်တွေကရေးသားရာကနေတစ်ဆင့် ပြန်လည်ရေးသားဖော်ပြနေကြပါတယ်။
ကျောက်မဲမြို့နယ်မှာ စစ်ကောင်စီနဲ့ TNLA အကြား တိုက်ပွဲ ပြင်းထန်နေတာ တစ်လခွဲအကြာ ရှိလာပြီဖြစ်ပြီး စစ်ကောင်စီဘက်က သာလွန်အင်အားနဲ့ ထိုးစစ်ဆင်တိုက်ခိုက်နေတာကြောင့် ကျောက်မဲမြို့ကို ဆက်လက်ထိန်းချုပ်ဖို့ အခက်အခဲရှိတယ်လို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက မီဒီယာတွေမှာ ဖြေကြားထားပါတယ်။
တအာင်းတပ် ထိန်းချုပ်ထားတဲ့ ကျောက်မဲမြို့ဟာ ပြည်ထောင်စုလမ်းမကြီးပေါ်မှာ တည်ရှိပြီး တရုတ်-မြန်မာ နယ်စပ်ကုန်သွယ်ရေးအတွက် အရေးပါတဲ့နေရာလည်း ဖြစ်ပါတယ်။
ကျောက်မဲမြို့ကို စစ်တပ်အောက် ရောက်သွားရင် ကျောက်မဲ–မိုးကုတ်၊ ကျောက်မဲ–နမ့်ဆန်နဲ့ ကျောက်မဲ–သီပေါဘက်ကို စစ်ကောင်စီဘက်က ဆက်လက် ထိုးစစ်ဆင်တိုက်ခိုက်လာနိုင်တဲ့ စစ်မျက်နှာကို တအာင်းတပ်ရင်ဆိုင်ရဖွယ် ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
