ပို့လဘား၊ ဇန်နဝါရီ ၁၀ ရက်၊ မူဆယ်
ရှမ်းမြောက် မူဆယ်မြို့မှာ ကားနဲ့ဆိုင်ကယ် ယာဉ်တိုက်မှု ဖြစ်ပွားခဲ့ပြီး ကလေး ၂ ဦး သေဆုံးခဲ့တယ်လို့ သိရပါတယ်။
ဒီနေ့ ဇန်နဝါရီ ၁၀ ရက် နေ့လယ် ၂ နာရီကျော်က မူဆယ်မြို့မှာရှိတဲ့ မင်္ဂလာမူဆယ် လမ်းမကြီးရှိ ၈ ထပ်တိုက်ရှေ့မှာ ဖြစ်ပွားခဲ့တာဖြစ်ပြီး ကလေး ၂ ဦး သေဆုံးခဲ့တယ်လို့ ကမ်းလင့်လက် လူမှုကူညီရေးအသင်းဝင်တစ်ဦးက ရွှေဖီမြေကို ပြောပါတယ်။
“၈ ထပ်တိုက်ရှေ့မာ ကားနဲ့ဆိုင်ကယ် တိုက်မိတာပေါ့။ ဆိုင်ကယ် စီးလာတဲ့ အရှေ့က ကောင်မလေးတော့ ပွဲချင်းပြီး သေဆုံးခဲ့တယ်။ နောက်ကလိုက်တဲ့ တစ်ယောက်တော့ ဆေးရုံမှာ သေသွားတာ။ ကားမောင်းလာတဲ့သူကိုတော့ ဖမ်းထားတယ် “
သေဆုံးသွားတဲ့ ကလေးနှစ်ယောက်ဟာ အသက် ၁၃ နှစ်နဲ့ ၁၆ နှစ်အရွယ်ဖြစ်ပြီး မူဆယ်မြို့ ပန်ခမ်းနဲ့ နောင်ရမ်းရွာမှာ နေထိုင်ကြတယ်လို့ ပြောပါတယ်။
ယာဉ်တိုက်မှု ဖြစ်ပွားခဲ့သူတွေကိုတော့ ရွှေလင်းရောင် လူမှုကူညီရေးအသင်းက သွားရောက် ကူညီပေးခဲ့တယ်လို့ ၎င်းက ဆက်ပြောပါတယ်။
