လွေးဇွန်မိုး၊ စက်တင်ဘာ ၂၇ ရက်၊ နမ္မတူ
တအာင်းတပ်-PSLF/TNLA ထိန်းချုပ်ထားတဲ့ နမ္မတူမြို့နယ် ဟွေဖတ်ရွာက အသက် ၉ နှစ်အရွယ် မောင်နန်အောင်ဟာ တစ်နှစ်ကျော်ကြာတဲ့အထိ မိသားစုဝင်တွေနဲ့ အဆက်အသွယ်မရပဲ ပျောက်ဆုံးနေတယ်လို့ မိသားစုဝင်တွေက ရွှေဖီမြေကို ပြောပါတယ်။
မောင်နန်အောင်ဟာ လားရှိုးမြို့မှာ ကျောင်းသွားတက်ရင်း တိုက်ပွဲစတင်ဖြစ်ပွားခဲ့တဲ့ ပြီးခဲ့တဲ့ ၂၀၂၄ ခုနှစ် ဇူလိုင်လထဲမှာ လားရှိုးကနေ တန့်ယန်းဘက်ကို စစ်ဘေးရှောင်ရာကနေ လက်ရှိအချိန်အထိ အဆက်အသွယ်မရပဲ ပျောက်ဆုံးနေတာဖြစ်တယ်လို့ မောင်နန်အောင်ရဲ့ မိသားစုဝင်တစ်ဦးက ပြောပါတယ်။
“ကလေးက ဖိနပ်ပျောက်တာကို ရိုက်ခံရမှာကြောက်တော့ အိမ်ကနေထွက်သွားတာ။ ထွက်သွားတော့ နောက်နေ့မှာ ကလေးက မန်စံက မူကြိုကျောင်းတစ်ခုမှာ ရောက်နေတယ်ဆိုပြီး ကျနော့်စီဖုန်းဆက်တယ်။ ကျနော်တို့ကလည်း ကလေးကိုသွားခေါ်တယ်။ ကလေးကပြန်မလိုက်ချင်ဘူး။ အဲဒါက ခေါ်ထားတဲ့ ဆရာမတွေကလည်း ကလေးကို ကျောင်းထားပေးမယ်တဲ့။ ဆရာမတွေက မန်စံကနေ ကျောင်းတက်ဖို့ဆိုပြီး လာရှိုးကို ပို့လိုက်တာ။ လားရှိုးမှာစစ်ဖြစ်တော့ တန့်ယန်းဘက်ရောက်သွားတာ။ တန့်ယန်းကနေပြီးတော့မှ အခုထိ ရှာလို့ရသေးဘူး။ ကျနော်တို့ စုံစမ်းကြည့်မယ်ဆိုပြီးတော့ ပြောနေတာပဲ”
တန့်ယန်းဘက်ကို စစ်ရှောင်သွားချိန်မှာ မောင်နန်အောင်ကို ခေါ်ယူမွေးစားတဲ့သူရှိတယ်လို့ သတင်းကြားပေမဲ့ မွေးစားသူဟာ ဘယ်သူဘယ်ဝါဖြစ်ကြောင်း မသိရဘူးလို့ ၎င်းရဲ့ မိသားစုဝင်တွေက ပြောပါတယ်။
မိသားစုဝင်တွေက စိုးရိမ်ပူပန်နေတာကြောင့် မောင်နန်အောင်ကို ခေါ်ယူမွေးစားထားသူဖြစ်စေ တွေ့ရှိသူတွေဖြစ်စေ ဖုန်း – 09 681 218 073 ကို ဆက်သွယ်အကြောင်းကြားပေးဖို့ မိသားစုဝင်တွေက တောင်းဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
