မာည်းရူပ၊ ကျံရ်ဆဲပ်တဲမ်ဘာ ဆငည်း 26၊ မာဝ်းႎံင်း
ကဝ်အီဂေါည်ခေဲင်ပ္လေါည်ကတီုက်ကပဴင်ကဲ က္လာင်းဒါႈ တံပ်ကညာအာဏာဆီုက်ဇေဝ်ကဲ ဂီုည်ထိုးဟာဝ်းခေဲင်ကီုင်းမာဝ်းစႎံင်းနီန် ကနာည်နှာင်းဘိူန်းကဲ ဆဲႈဒီန် ဂီုည်ဒါဘိုးယာန်ပ်ုရ် ပျောႈဟာဝ်းဘျုင်အောႏ။
ဘံင်အမှိူဝ် ကျံရ်ဆဲပ်တဲမ်ဘာ ဆငည်း 25 နီန် တံပ်ကညာအာဏာဆီုက်ဇေဝ်ကဲ ဂီုည်ဂေါည်လိူည် တောပ်ဒေင်မာဝ်းႎံင်း – နောင်ခေဝ်နီန် ခနားရဝ်တားအိုက်ခန့် ကာည်း ရဝ်စခန်းသာနီန် ဆဲႈဒီန် တံပ်ဆီုက်တအာင်း TNLA ကာည်း တံပ်ကညာအညဏာဆီုက်ဇေဝ်ကဲမာ် ဂီုည်ဆီုပ်ပဲန်ဖါ်ႈ ပ္လေါည်ကတီုက်ကပဴင်အောႏ။
ကဝ်အီဂေါည်ခေဲင်ပ္လေါည်ကတီုက်ကပဲင်နီန်အူအီး က္လာင်းတဖုင်ဆျှိုည်ဖီမျေဒါႈ “ ကဇေန်နီး တံပ်ကညာအာဏာဆီုက်ဇေဝ်ကဲ တိုန်းဟာဝ်းရဲင်ဘ္လောမ်အီဂေါည်ရဘံန်နီန် ရအာည်ႇ။ အဒိူဝ်နီန် ကဲပဲန်ပ္လေါည်ကတီုက်ကပဴင်နီန် ခနရဝ်နားအိုက်ခန့် ကာည်း စခန်းသာနီန်။ TNLA မာ်ရဲန်အူန်းကနာည်နံင်ခုခါမ်နီန်အောႏ”။
ဆဲႈဒီန် ဒီပဲန်ဟာဝ်းပ္လေါည်ကတီုက်ကပဴင်နီန်မာ် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက် ကာည်း Y -12 နီန် ပျောႈဟာဝ်းဘျုင် 30 ပိုင်းအောႏ။
ဒီပဲန်ဟာဝ်းပ္လေါည်ကတီုက်ကပဴင် ရဝ်စခန်းသာ ကာည်း ရဝ်နားအိုက်ခန့်နီန် အ်ုန်ကဒိုင်းတောပ်လိူည် ဒီထိင်ခြဲတံပ်ဆီုက်တအာင်းကဲ ကီုင်းမာဝ်းႎံင်းနီန် ကပံတ် 8 မဲင်အောႏ။
ဂေါႇဘည်ထိုး ဆီုက်ငါး တံပ်ကညာအာဏာဆီုက်ဇေဝ်ကဲ ခေဲင်လှံင်မာဝ်းႎံင်းနီန် တံပ်ကညာအာဏာဆီုက်ဇေဝ်ကဲ ကာည်း တံပ်ဆီုက်တအာင်း TNLA ကဲ ပဲန်ကရဲင်ဟာဝ်း ပ္လေါည်ကတီုက်ကပဴင်နီန် ဟည်ဘိူန်း 1 ကျံရ်လေႈ ကဒါႇတံပ်တအာင်းကဲမာ် ဂီုည်ဆီုပ်တီုက်ဟာဝ်းအူန်း ကနာည်နံင်အာဝ်ဇောႈ ကီုင်းမာဝ်းႎံင်းနီန်အောႏ။
တံပ်ကညာအာဏာဆီုက်ဇေဝ်ကဲ ဟံပ်အူန်းဖါ်ႈ လှံင်မာဝ်းႎံင်း ကာည်း လှံင်ဆဘောနီန် ဒီနံင်ရေဲန်ကဲတ ပ္လေါည်ရံရ်ႈက်ုန်ရံရ်နီန် ဂေါႇဘည်ဒီန် အာည်ႇရောတ်ပ္လေါည်က်ုန်ရံရ်နီန် ကဲဂီုည်ဆီုပ်တီုက်ဟာဝ်း ကီုင်းဂါရ်ဒီန် ကနာည်နံင်ဘိူန်းကဲတထိင်ခြဲအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
