ရွှေဖီမြေ၊ စက်တင်ဘာ ၂၆ ရက်၊ ကျောက်မဲ
တအာင်းတပ်- PSLF/TNLA ထိန်းချုပ်ထားတဲ့ ကျောက်မဲမြို့အနီး ပါပုတ်ကျေးရွာထဲ စစ်ကောင်စီတပ်က ဒရုန်းအသုံးပြုပြီး ဗုံးကြဲတိုက်ခိုက်ခဲ့တာကြောင့် အသက် ၆၉ နှစ်အရွယ် အမျိုးသားတစ်ဦး သေဆုံးခဲ့တယ်လို့ TNLA က ထုတ်ပြန်ပါတယ်။
ဖြစ်စဉ်က ဒီနေ့ စက်တင်ဘာ ၂၆ ရက် မနက် ၁၁ နာရီခွဲက တိုက်ပွဲ ဖြစ်ပွားခြင်းမရှိတဲ့ ကျောက်မဲမြို့မြောက်ဘက်ရှိ ပါပုတ်ရွာထဲ ဒရုန်းနဲ့ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
စစ်တပ်ဟာ ကျောက်မဲမြို့ကို ထိုးစစ်ဆင်တာ အောင်မြင်နိုင်ဖို့အတွက် ကစထ ၂ ဒုဗိုလ်ချုပ်ကြီး နိုင်နိုင်ဦးနေရာကို ကစထ ၅ ဒုဗိုလ်ချုပ်ကြီး ဇော်မင်းလတ်ကို စစ်ဆင်ရေး ကွပ်ကဲဖို့ အစားထိုး ခန့်အပ်ခဲ့ပါတယ်။
ကစထ ၅ က ဇော်မင်းလတ်ကို အစားထိုး ခန့်အပ်လိုက်ပြီးတဲ့ မကြာခင်မှာပဲ နားအိုက်ခန့်ရွာထဲ Y-12 နဲ့ ဗုံးသီးအလုံးရေ ၃၀ ကျော် ကြဲချတိုက်ခိုက်ခဲ့ပါတယ်။
မနေ့ စက်တင်ဘာ ၂၅ ရက် ညပိုင်းမှာလည်း စခန်းသာရွာတစ်ဝိုက်မှာ လေကြောင်းကနေ Y-12 နဲ့ ဗုံးအလုံးရေ ၃၀ ခန့် ကြဲချတိုက်ခိုက်ခဲ့ပါတယ်။
ဒီနေ့မှာလည်း စခန်းသာရွာကိုရောက်ဖို့ စစ်တပ်ဖက်က လေကြောင်း တိုက်ခိုက်မှု ပြုလုပ်ခဲ့တယ်လို့ စစ်ရေး သတင်းရင်းမြစ်တွေဆီကနေ သိရပါတယ်။
လက်ရှိအချိန်ထိ စခန်းသာရွာအနီးဝန်းကျင်မှာ စစ်တပ်နဲ့ TNLA တို့ တိုက်ပွဲ ဆက်လက် ပြင်းထန်နေပြီး ကျောက်မဲမြို့ကို ပြန်လည်သိမ်းပိုက်နိုင်ဖို့ စစ်ကောင်စီတပ်ဟာ လေကြောင်းနဲ့ ဒရုန်းတိုက်ခိုက်မှု ပိုမိုပြုလုပ်လာနိုင်လို့ မြို့ခံလူထုတွေအနေနဲ့ သတိထားဖို့ လိုအပ်တယ်လို့ စစ်ရေး ကျွမ်းကျင်သူတွေက သတိပေးထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
