မိုင်းအရှိုင်း၊ စက်တင်ဘာ ၂၅ ရက်၊ ကျောက်မဲ
တအာင်းတပ်မတော်- PSLF/TNLA ထိန်းချုပ်ထားတဲ့ ကျောက်မဲနဲ့ သီပေါမြို့နယ်မှာရှိတဲ့ တအာင်းရဲတပ်ဖွဲ့က စစ်ကောင်စီ လွှတ်လာတဲ့ ထောက်လှမ်းရေးတပ်ဖွဲ့ဝင် ၁၀ ဦးထက်မနည်းကို ဖမ်းဆီးရမိထားတယ်လို့ ရွှေဖီမြေက စုံစမ်းသိရှိရပါတယ်။
အမည်မဖော်လိုတဲ့ သီပေါမြို့နယ်မှ တအာင်းရဲတာဝန်ခံတစ်ဦးက “တည်းခိုခန်း၊ ဟိုတယ်၊ ဘုန်းကြီးကျောင်း၊ မသင်္ကာတဲ့ နေရာတွေမှာ ကျနော်တို့ ရှောင်တခင် စစ်ဆေးတဲ့အချိန် ကင်းလှည့်စစ်ဆေးတဲ့အချိန် သူတို့ကို ဖမ်းဆီးရမိတာပေါ့” လို့ ဆိုပါတယ်။
စစ်ကောင်စီရဲ့ ထောက်လှမ်းရေးတပ်ဖွဲ့ဟာ တိုက်ပွဲ ပြင်းထန်နေတဲ့ ကျောက်မဲမြို့မှာ အဓိက လှုပ်ရှားတာဖြစ်တယ်လို့ ဖမ်းဆီးရမိတဲ့ ထောက်လှမ်းရေးတပ်ဖွဲ့ဝင် တပ်ကြပ်တစ်ဦးရဲ့ ထွက်ဆိုချက်ကို ကိုးကားပြီး ရဲတပ်ဖွဲ့ဝင်က ရွှေဖီမြေကို ပြောပါတယ်။
PSLF/TNLA ထိန်းချုပ်ထားတဲ့ မြို့တွေကို ပြန်လည်သိမ်းပိုက်နိုင်ဖို့ ရည်ရွယ်ကာ လားရှိုးမြို့ကနေ ကျောက်မဲ၊ သီပေါဘက် ထောက်လှမ်းဖို့တပ်ဖွဲ့ဝင် ရာနဲ့ချီ ပို့ဆောင်လာတာဖြစ်တယ်လို့ ဖမ်းဆီးခံရတဲ့ ထောက်လှမ်းရေးတပ်ဖွဲ့ဝင်က ထွက်ဆိုခဲ့တယ်လို့ ဆိုပါတယ်။
ထောက်လှမ်းရေးတပ်ဖွဲ့တွေဟာ ခရီးသွား၊ သူဌေး၊ ကားသမား၊ သူတောင်းစား ယောင်ဆောင်ကာ လမ်းလျှောက်လာတာအပြင် ဆိုင်ကယ်နဲ့ကား စီးပြီး ကျောက်မဲနဲ့သီပေါမြို့တွင်းထဲ ပုံစံအမျိုးမျိုးနဲ့ ဝင်ရောက်လာကြတယ်လို့ တအာင်းတပ်ကလည်း ဒီနေ့ စက်တင်ဘာ ၂၅ ရက်မှာ ထုတ်ပြန်လာပါတယ်။
အဲဒီထောက်လှမ်းရေးတွေက TNLA ရဲ့ စစ်အင်အား၊ လက်နက်ခဲယမ်း၊ လမ်းပန်းဆက်သွယ်ရေး ထောက်လှမ်းတာနဲ့ လေကြောင်းကနေ တိုက်ခိုက်ဖို့ ပစ်မှတ်ပေးတာ စတဲ့သတင်းအချက်အလက်တွေကို ထောက်လှမ်းကြတာလို့ ဆိုပါတယ်။
တအာင်းရဲတပ်ဖွဲ့က အဲဒီထောက်လှမ်းရေးတွေကို ဖမ်းဆီးနိုင်ဖို့ ဒေသခံတွေကိုပါ ၂၄ နာရီကြာ ခေါ်ယူစစ်ဆေးခဲ့ပြီး ခေါ်ယူစစ်ဆေးသူ ၃၀ ကျော်ကို ပြန်လည်လွှတ်ပေးခဲ့ပေမဲ့ သတင်းပေးလို့ ယူဆရသူတွေကို ထိန်းသိမ်းထားဆဲဖြစ်တယ်လို့ ရဲတပ်ဖွဲ့ဝင်တွေဆီကနေ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
