ဆျှိုည်ဖီမျေ၊ ကျံရ်ဆဲပ်တီမ်ဘာ ဆငည်း 19၊ မကွေး
ဘိူန်းအယ်နံပ်မိုႈတ ဆုဒါင်းထီ အီမိုႈဆု 500ဆဲန် ကနာည်ထီကျံရ်အောဂ်ုတ် ဇီုင်းပိင်ငျာခြိူဝ်းတအာင်းကဲနီန်မိုႈ တာမ်အီအွံရ် တံပ်လံပ်ကတ်ုမ်ကူန်ရဝ်မာဂါင် ကပီုန်ဒါင်းမကွေး NUG အ်ုန်အီဇီုဝ်ကိုဝေလင်းနီန်မိုႈ အီပေါက်ဟာဝ်းအောႏ။
ကဲဒါႈမိုႈ ထီတအာင်းပ်ုန်ႎိူဝ်ႈဒေဲႈကဲ ခည်ကျံရ်အောဂ်ုတ် ဆငည်း 1ဒိူန် ယိူဝ်ႇတမိုႈ ကိုဝေလင်းနီန် အ်ုန်ထိုးကနာည်အူပံပ် စီပေါက်ဟာဝ်းလာ် ဆုဒါင်း ရိူန်း 500ဆဲန်နီန်အောႏ။
တားဆဲင်ႏငျံရ် အ်ုန်အီမိုႈ အီအွံရ်ဖုင် လံပ်ချှာင်ဇီုင်းကာန် ထီကော်င်ဆံရ်ဇီုင်းပိင်ငျာခြိူဝ်းတအာင်းကဲ က္လာင်းဒါႈ ခေဲင်ဆုဒါင်း ရိူန်း 500ဆဲန် ပ်ုန်ပေါက်ဟာဝ်းအ်ုန်ဒီန် အ်ုန်ႎီရ်လှူဘိုး ကနာည်ကျောင် TLEC ကဲ 70ဆဲန်အောႏ။
“အ်ုန်ထိုးအူပံပ်။ ဘံန်မိုႈအ်ုန်ပေါက် အ်ုန်စီႎီရ်လှူဘိုး ကနာည်ကျောင် TLEC ကဲ 70ဆဲန်။ ကဒါႇယဲမာ် အာပ်ဒေဲႈအူန်း ပ္လါႇဘေဲႇလှ်ုပ်ဂုင်နီန် တအ်ုန်”
တားဆဲင်ႏငျံရ်ဆီုပ်က္လာင်းဒါႈဘိုး ယဲလှူဒဲႈ ရိူန်းပ်ုန်ဘိူန်းတယံင်းထီကဲနီန် တကျောင်ပနောဘေဲႇ ပ်ုန်ႎိူဝ်ႈအူန်းအယ် ခေဲင်အရာပ်တအာင်းနီန်တောန်ကျံရ် ခေဲင်ဘြည်အူဆန်ုမ်လှိူဝ်းနီန် ကဲဟည်ဘယ်ဒေ ကဇောည်ဒဲႈရိူန်းတ TLEC ကဲ ဆဲန် 1မှီုန်လေႈ 6ဟြဲင်ဘျာအောႏ။
“ဘာည်းကဇေန်နီး အာဝ်ဒါႈခြိူဝ်းမှောမာ်လ ယဲတာင်အူန်းကေးစူးဒါင်းဒါင်း တကဲအီကဇောည် ဒဲႈရဲင်ဒဲႈဘ္လောမ် တထီကဇောည်လံပ်ပိင်ငျာနီန်။ ကဲပေါက်ဟာဝ်းမာ် ယဲခိုည်းရျံန်ဖါ်ႈ တိူဝ်ႈကနေဲႈဒါင်းဒါင်း။ ထီယဲနီန် ယဲဟြီုက် ကနာည်နံင်ဘယ်ဒဲႈ ရူရ်ႈကျံရ် တာဆြာ ယာဆြာ ကဲအီပနောဒဲႈဘေဲႇ တခြိူဝ်းမျိုးတောန်နဲ အီဂေါည်ခေဲင်အရာပ်ကဲနီန်ယာ့်။ ဂေါႇဘည်ဒီန် စီပဲန်ကနာည်အနာဂါတ် ကောန်ကညောမ်ကဲ အာဝ်ဒါႈခြိူဝ်းမျိုးမှောမာ်လ လိုအေ့ ကရူမ်းကရောမ်ကဇောည်”
ထီလံပ်ပိင်ငျာတအာင်းနီန် ကဲႎိူဝ်ႈဖါ်ႈတောန်ကျံရ် ဆငည်း 1 ယိူဝ်ႇတဆုဒါင်း ဆဲန် 500 ရောတ်ဘံင် ဆု 2ဆဲန်ဘျာ ကစုကပိုမ်ဆုနီန်ဂေါည် 126ဆုအောႏ။
ထီအူပ္လါႇနီန် အီယံင်းဒဲႈဖါ်ႈ 2000ဘျာ ဘည်ဘိူန်းဇိူရ်ႈ ဒဲႈရဲင်ဒဲႈဘ္လောမ် တက်ုရ်ရံရ်ထီကဲနီန်တောန်လှံင် ကဆီုဝ်ကဲအီဆိင်ဒဲႈရဲင် တေဲင်အောန်လဴင်မာ် ဘိူန်းအေ့ဇိူရ်ႈ ဒဲႈရဲင်တ Ta’ang Education Lottey Facebook Page နီန်အောႏ။
TLEC နီန် ကဲႎိူဝ်ႈအူန်းဖါ်ႈ ကျောင်ပနောဘေဲႇ ခေဲင်လှံင် 10လှံင်နီန် 350ကျောင် ဒါရဲင်ဘ္လောမ် တာဆြာယာဆြာ ကဲအီတိူဝ်ႈဒါနောႈလူည်ကဲနီန်ကာည်း တာဆြာယာဆြာ ကဲအီတောပ်ခေဲင် ဘည်ရည်းလံပ်ဆံင်ခံတ်အာဏာ (CDM) ကဲနီန် 1600အီး ပနောဒဲႈဘေဲႇတကောန်ကျောင်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
