မြတ်နိုး၊ စက်တင်ဘာ ၁၈
ကချင်ပြည်နယ် အစပ်ရှိ စစ်ကိုင်းတိုင်းဒေသကြီး၊ ကသာခရိုင်၊ ဗန်းမောက်မြို့အနီး ဒီနေ့ စက်တင်ဘာ ၁၈ ရက်နေ့အထိ တိုက်ပွဲ ဆက်လက်ဖြစ်ပွါးနေပြီး စစ်ကောင်စီရဲ့ ကာကင်းတချို့လည်း သိမ်းပိုက်ရရှိထားကြောင်း တော်လှန်ရေးတပ်ဖွဲ့နဲ့ နီးစပ်သူတွေ ဆီက သိရပါတယ်။
“တိုက်ပွဲက ၄ ရက်ရှိပြီ။ ဒီမနက်လည်း လေကြောင်းဗုံးတွေ ခဏခဏလာကြဲတယ်လို့ သိရတယ်” လို့ တော်လှန်ရေးတပ်ဖွဲ့နဲ့ နီးစပ်သူ အမျိုးသားတစ်ဦးက ပြောပါတယ်။
တိုက်ပွဲ စတင်ဖြစ်ပွါးခဲ့သည့် စက်တင်ဘာ ၁၅ ရက်နေ့ကစ စစ်ကောင်စီဘက်က လေကြောင်းနဲ့ ဗုံးကြဲတိုက်ခိုက်ခဲ့ပြီး စက်တင်ဘာ ၁၇ ရက် မွန်းလွဲပိုင်းမှာလည်း ဗုံးကြဲတိုက်ခိုက်ခဲ့တယ်လို့ သိရကာ တိုက်ပွဲ ၄ ရက်အတွင်း စစ်ကောင်စီတပ်ဘက်က ၃ ရက်ဆက်တိုက် လေကြောင်း အသုံးပြုခဲ့ကြောင်း သူက ပြောပါတယ်။
လက်ရှိမှာတော့ ဗန်းမောက်မြို့ကို တော်လှန်ရေးတပ်ဖွဲ့တွေဖြစ်တဲ့ အမှတ် (၁) စစ်ဒေသ၊ ကသာခရိုင်ကွပ်ကဲရေးမှူး ဦးဆောင်မှုနဲ့ ကသာခရိုင် တပ်ရင်း (၂)၊ (၄)၊ (၅)၊ အမှတ် (၁) စစ်ဒေသ စစ်ကြောင်း၊ အထူးလှုပ်ရှားတပ်ရင်းတွေ၊ ကသာခရိုင် ပကဖ လှုပ်ရှားအဖွဲ့၊ ကသာခရိုင် လက်နက်ကြီးအဖွဲ့၊ ဗန်းမောက်မြို့နယ် ပကဖ တို့ ပူးပေါင်းပြီး ထိုးစစ်ဆင်နေကြတယ်လို့ ဆိုပါတယ်။
“လက်ရှိအချိန်ထိ မြို့အနီးနားက ကာကင်းစခန်း ၆ ခု ရထားတယ်” လို့ တော်လှန်ရေးတပ်ဖွဲ့ ရှေ့တန်းသတင်းအရင်းမြစ် ပြောပါတယ်။
အဲဒီကာကင်းတွေဟာ မြစ်သေးချင်းရွာ ကာကင်းကုန်း (၁) နဲ့ (၂)၊ တာဝါတိုင်ကုန်း၊ AGBT၊ ကျွဲကောကုန်း၊ စက်တောကုန်း တို့ ဖြစ်ပြီး စက်တင်ဘာ ၁၅ ရက်နေ့ကတည်းက သိမ်းယူနိုင်ခဲ့ကြောင်း၊ အဲဒီကာကင်းစခန်းတွေမှာ SNA တပ်မဟာ (၆၁၄) က အင်အား ၄၀၀ ခန့်ရှိကြောင်း သိရတယ်လို့ သူက ပြောပါတယ်။
ဗန်းမောက်မြို့နဲ့ အနီးဝန်းကျင်မှာတော့ စစ်ကောင်စီ တပ်မ (၇၇) လက်အောက်ခံတပ်ဖွဲ့တွေနဲ့ SNA တို့ ပူးပေါင်းလှုပ်ရှားနေတဲ့ နယ်မြေဖြစ်ပြီး မြို့အဝင်အထွက် ပိတ်ထားတာကြောင့် ပြည်သူတချို့ ပိတ်မိနေသလို တိုက်ပွဲကြောင့်လည်း ပိတ်မိပြည်သူတွေ ထိခိုက်မှု ရှိနေတယ်လို့ ကြားရပေမယ့် အတိအကျ မသိရဘူးလို့ ဆိုပါတယ်။
ဗန်းမောက်မြို့ဟာ အမျိုးသားညီညွတ်ရေးအစိုးရ ထိန်းချုပ်ထားတဲ့ ပင်လည်ဘူးမြို့နဲ့ အင်အင်းတော်မြို့ ကြားမှာ တည်ရှိပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
