မိုင်းရူပ၊ စက်တင်ဘာ ၁၅ ရက်၊ လားရှိုး
စစ်ကောင်စီပြန်ထိန်းချုပ်ထားတဲ့ ရှမ်းမြောက် လားရှိုးမြို့မှာ စစ်ကောင်စီတပ်ဘက်က စစ်ဆေးမှုတွေ ပိုတင်းကြပ်လာပြီး လူငယ်တချို့ ဖမ်းဆီးခံရတာရှိနေတယ်လို့ ရွှေဖီမြေက စုံစမ်းသိရှိရပါတယ်။
နမ္မတူ-လားရှိုးမြို့အဝင်ဂိတ်နဲ့ သီပေါ-လားရှိုးမြို့အဝင်ဂိတ်တွေမှာ စစ်ကောင်စီတပ်ဘက်က ဖြတ်သန်းသွားလာသူတွေကို စစ်ဆေးတာတွေ ပြုလုပ်နေပြီး ဒီရက်ပိုင်းအတွင်း တော်လှန်ရေးတပ်တွေနဲ့ ဆက်စပ်မှုရှိတယ်ဆိုတဲ့ စွပ်စွဲချက်နဲ့ တအာင်းလူငယ်တချို့ ဖမ်းဆီးခံရတာတွေ ရှိနေပါတယ်။
တင်းကြပ်တဲ့ စစ်ဆေးမှုတွေကို စစ်ကောင်စီတပ်ဘက်က နေ့စဉ်လိုလို ပြုလုပ်တာမရှိဘဲ ရက်ခြားပြီး စစ်ဆေးတာတွေ ပြုလုပ်နေတယ်လို့ လားရှိုးမြို့အဝင် စစ်ကောင်စီစစ်ဆေးရေးဂိတ်မှာ ဖြတ်သန်းသွားလာခဲ့တဲ့ အမျိုးသမီးတစ်ဦးက ရွှေဖီမြေကို ပြောပါတယ်။
“သူတို့က စစ်ချင်တဲ့အချိန်စစ်တာ။ နေ့တိုင်းတော့ မဟုတ်ဘူး။ မနေ့ (စက်တင်ဘာ ၁၄ ရက်) ကျမတို့ ဖြတ်လာတဲ့အချိန်တောင်မှာ ယောကျာ်းလေးဆို တအားစစ်တယ်။ ပြီးတော့ ကားတွေဆို ပိုစစ်တယ်။ ရက်ပိုင်းပဲ ရှိသေးတယ်။ အမျိုးသားတစ်ယောက် ဖမ်းခံရသေးတယ်” လို့ ဆိုပါတယ်။
လားရှိုးမြို့ပေါ်ရှိ ရပ်ကွက် ၁၂ ခုကို စစ်ကောင်စီက ထိန်းချုပ်ထားပြီး မြို့ပြင်က ကျေးရွာတွေကိုတော့ ကိုးကန့်တပ်မတော် (MNDAA) က ထိန်းချုပ်ထားတာ ဖြစ်ပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် ကိုးကန့်တပ်မတော် (MNDAA) တိုက်ခိုက်သိမ်းပိုက်ထားတဲ့ လားရှိုးမြို့ပေါ်က နေရာတွေကို ပြီးခဲ့တဲ့ ဧပြီလထဲမှာ စစ်ကောင်စီထံ ပြန်လည် လွှဲပြောင်းပေးခဲ့ရတာ ဖြစ်ပါတယ်။
လားရှိုးမြို့ပေါ်မှာ စစ်ကောင်စီရဲ့ အုပ်ချုပ်ရေးယန္တရားတွေ လည်ပတ်နေတာ ၅ လနီးပါး ရှိလာပြီ ဖြစ်ပေမယ့် စစ်ကောင်စီဘက်က လားရှိုးမြို့အခြေအနေနဲ့ ပတ်သက်ပြီး တစုံတရာ သတင်းထုတ်ပြန်ထားတာ မရှိသေးပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
