မိုင်းရူပ၊ စက်တင်ဘာ ၁၀ ရက်၊ သပိတ်ကျင်း
စစ်ကောင်စီတပ်ရဲ့ ထိုးစစ်ကြောင့် မန္တလေးတိုင်း သပိတ်ကျင်းမြို့နယ်ထဲက ဇရပ်ကွင်းကျေးရွာအပါအဝင် ကျေးရွာ ၅ ထက်မနည်းက ဒေသခံ ၅ ထောင်ကျော် ထွက်ပြေးတိမ်းရှောင်နေရတယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
ပြီးခဲ့တဲ့ စက်တင်ဘာ ၆ ရက်မှာ မန္တလေး–မိုးကုတ် လမ်းပိုင်းကို ထိန်းချုပ်ဖို့ စစ်ကောင်စီတပ်ဟာ သပိတ်ကျင်းမြို့ဘက်နေ ဇရပ်ကွင်းကျေးရွာဘက်ကို စတင်ထိုးစစ်ဆင်တိုက်ခိုက်ခဲ့တာ ဖြစ်ပါတယ်။
စစ်ကောင်စီရဲ့ ထိုးစစ်ကြောင့် ထွက်ပြေးတိမ်းရှောင်နေသူတွေထဲမှာ ရွှေမွှေးချောင်း၊ ၄ မိုင်၊ ၆ မိုင်၊ ဇရပ်ကွင်းနဲ့ ရေပူလယ်တီ စတဲ့ ကျေးရွာတွေက ဒေသခံ ၅ ထောင်ကျော် ဘေးလွတ်ရာကို ထွက်ပြေးတိမ်းရှောင်နေရကြပါတယ်။
“တိုက်ပွဲက ရွှေမွှေးချောင်းဘက်မှာ ဖြစ်နေတယ်။ ဒေသခံတွေကတော့ ပြေးနေကြပြီ။ စစ်ကောင်စီက ဇရပ်ကွင်းဘက်ကို ဟောင်ဝစ်ဇာ လက်နက်ကြီးနဲ့ ဆက်တိုက်ပစ်နေတာ” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
လက်ရှိမှာ ဇရပ်ကွင်းရွာအနီးရှိ ရွှေမွှေးချောင်းကျေးရွာမှာ စစ်ကောင်စီတပ်နဲ့ တော်လှန်ရေးတပ်ဖွဲ့တွေကြား တိုက်ပွဲတွေ ဆက်လက်ဖြစ်ပွားနေတယ်လို့ မြေပြင်မှာရှိတဲ့ တော်လှန်ရေးတပ်ဖွဲ့ဝင်တစ်ဦးက ပြောပါတယ်။
ဇရပ်ကွင်းကျေးရွာဟာ မိုးကုတ်–မန္တလေးလမ်းမပေါ်မှာ တည်ရှိတဲ့ ရွာကြီးဖြစ်ပြီး စစ်ရေးအရလည်း အရေးပါတဲ့ နေရာဖြစ်သလို ရွှေတွင်းတွေ ထွက်ရာဒေသလည်းဖြစ်ပါတယ်။
ထို့အပြင် တော်လှန်ရေးတပ်တွေက ထိန်းချုပ်ထားတဲ့ နေရာလည်း ဖြစ်ပါတယ်။
သပိတ်ကျင်းမြို့နယ်မှာ တအာင်းတပ်မတော်–TNLA အပါအဝင် မိုးကုတ်ဗျူဟာ၊ Try ဗျူဟာ၊ မန္တလေး PDF နဲ့ အမျိုးသားညီညွတ်ရေးအစိုးရ–NUG လက်အောက်ခံတပ်တွေ သွားလာလှုပ်ရှားနေကြတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
