မိုင်းရူပ၊ စက်တင်ဘာ ၁၀ ရက်၊ လားရှိုး
စစ်ကောင်စီတပ် ပြန်ထိန်းချုပ်နေတဲ့ ရှမ်းမြောက် လားရှိုးမြို့မှာ စစ်ကောင်စီရဲ့ ရွေးကောက်ပွဲကော်မရှင်က ဦးဆောင်ပြီး ရွေးကောက်ပွဲအတွင်းအသုံးပြုမယ့် အီလက်ထရောနစ် မဲပေးစနစ်နဲ့ ပတ်သက်ပြီး မဲပေးရမယ့်ပုံစံတွေကို ပြသနေတယ်လို့ ရွှေဖီမြေက စုံစမ်းသိရှိရပါတယ်။
လားရှိုးမြို့ပေါ် လူထုတွေကို အီလက်ထရောနစ် မဲပေးစနစ်နဲ့ ပတ်သက်ပြီး မဲပေးရမယ့်ပုံစံကို မပျက်မကွက် လာကြည့်ဖို့ စစ်ကောင်စီရဲ့ ရွေးကောက်ပွဲကော်မရှင်က ရပ်ကွက်အုပ်ချုပ်မှူးကနေတစ်ဆင့် စာပို့ခိုင်းထားတယ်လို့ မြို့ခံတွေက ပြောပါတယ်။
ဒီနေ့ စက်တင်ဘာ ၁၀ ရက်မှာတော့ လားရှိုးမြို့ ရပ်ကွက် (၁၂) ရှိ မန်ဆူကျောင်းမှာ စစ်ကောင်စီရဲ့ ရွေးကောက်ပွဲကော်မရှင်က ဦးဆောင်ပြီး မြို့ခံတွေကို ခေါ်ယူကာ အီလက်ထရောနစ် မဲပေးစနစ်နဲ့ ပတ်သက်ပြီး မဲပေးရမယ့်ပုံစံတွေ ပြသနေတယ်လို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
“ရွေးကောက်ပွဲသုံး စက်နဲ့ ပတ်သက်ပြီး အသိပညာပေး အစည်းအဝေးကို တစ်ရပ်ကွက်ချင်း ခေါ်ပြီး ပညာပေး လုပ်ပြပါတယ်” လို့ ဆိုပါတယ်။
စစ်ကောင်စီတပ် ဦးဆောင်ကျင်းပမယ့် ရွေးကောက်ပွဲမှာ မြန်မာ အီလက်ထရောနစ် မဲပေးစနစ် အသုံးပြုမယ်ဆိုပြီး စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ထားပါတယ်။
ရွေးကောက်ပွဲကို ပထမအပိုင်းအနေနဲ့ လာမယ့် ဒီဇင်ဘာလ ၂၈ ရက်မှာ ကျင်းပဖို့ စစ်ကောင်စီက ပြင်ဆင်ထားပြီး စစ်ကောင်စီရဲ့ ရွေးကောက်ပွဲမှာ ပါဝင်ယှဉ်ပြိုင်မယ့် ပါတီ ၅၀ ကျော် ရှိပါတယ်။
ပထမအပိုင်းမှာ ပြုလုပ်မယ့် စစ်ကောင်စီရဲ့ ရွေးကောက်ပွဲမှာ ရှမ်းမြောက်က နောင်ချို၊ လားရှိုးနဲ့ မူဆယ် စတဲ့မြို့နယ်တွေ ပါဝင်ထားတာ တွေ့ရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
