လွေးဇွန်မိုး၊ ဇန်နဝါရီ ၈ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ မူဆယ်မြို့ ပန်လုံရပ်ကွက်(၁)က ၂၉ နှစ်အရွယ် နော်ဆိုင်းဆိုသူဟာ ထင်းခွေသွားရင်း မိုင်းနင်းမိပြီး ဘယ်ဖက်ခြေထောက် ပြတ်သွားပါတယ်။
နော်ဆိုင်းဟာ ပြီးခဲ့တဲ့ ဇန်နဝါရီ ၂ ရက် ညနေ ၄ နာရီခွဲက ပန်လုံရပ်ကွက်(၁)ဘက် ရောင်းဖို့ ထင်း သွားခွေရင်း မိုင်းနင်းမိခဲ့တာဖြစ်ပြီး မိုင်းနင်းမိတဲ့နေရာရဲ့ မလှမ်းမကမ်းမှာ ပြည်သူ့စစ်စခန်း ရှိတယ်လို့ နော်ဆိုင်းရဲ့ သူငယ်ချင်းဖြစ်သူ အမျိုးသားတစ်ဦးက ပြောပါတယ်။
“ရပ်ကွက်ထဲမှာလို့လည်း ပြောလို့ရပါတယ်။ အိမ်နဲ့လည်း မလှမ်းမကမ်း ရှိပါတယ်။ အဲနားမှာ တရုတ်အိမ် ရှိတယ်။ တရုတ်အိမ်နဲ့ သိပ်ပြီးတော့ မဝေးဘူး။ နှစ်လန် သုံးလန်လောက်မှာပေါ့။ အဲမနက်လည်း (ထင်း)သွားခွေတယ်။ အဲညနေပိုင်းမှာပဲ ဖြစ်သွားတာ။ အဲနားမှာတော့ တိုက်ပွဲ မဖြစ်ဖူးဘူး။ သိပ်ပြီးတော့ မလှမ်းမကမ်းမှာတော့ စစ်တပ်ကုန်း ရှိတယ်။ တပ်နာမည်တော့ မသိဘူး။ ပြည်သူ့စစ်တွေ နေတာဆိုတော့ ပြည်သူ့စစ်ကုန်းလို့ ပြောတာဘဲ”
လက်ရှိမှာတော့ ဒဏ်ရာ ရခဲ့တဲ့ အဲဒီအမျိုးသားကို နမ့်ခမ်း ပြည်သူ့ဆေးရုံမှာ ကုသမှု ခံယူဖို့ ပို့ဆောင်ထားတယ်လို့ ဆိုပါတယ်။
နော်ဆိုင်းဟာ ကချင်ပြည်နယ် မြစ်ကြီးနားမြို့ အောင်မြင်သာရပ်ကွက်ကဖြစ်ပြီး တရုတ်ဘက် အလုပ် ဝင်လုပ်ရာကနေ အဆင်မပြေတာကြောင့် မူဆယ်မြို့မှာ ကြုံရာအလုပ် လုပ်ရင်း အခုလို ဖြစ်သွားတာလို့ ၎င်းရဲ့သူငယ်ချင်းဖြစ်သူက ပြောပါတယ်။
၁၀၂၇ စစ်ဆင်ရေး စတင်တဲ့ ၂၀၂၃ ခုနှစ် အောက်တိုဘာလကနေ ၂၀၂၅ ခုနှစ် ဇန်နဝါရီ ၈ ရက်အထိ ၁ နှစ်ကျော်အတွင်း ရွှေဖီမြေက လက်လှမ်းမှီသလောက် ကောက်ယူထားတဲ့ စာရင်းအရ ရှမ်းမြောက်မှာ မြေမြှုပ်မိုင်းကြောင့် အမျိုးသမီး ၂ ဦးနဲ့ ကလေး ၁ ဦးအပါအဝင် ၈ ဦး သေဆုံးပြီး ကလေးတစ်ဦးအပါအဝင် အမျိုးသား ၃၂ ဦး၊ အမျိုးသမီး ၁၀ ဦးနဲ့ ကျား မ မသိရတဲ့ဒေသခံ ၃ ဦး ထိခိုက်ဒဏ်ရာ ရခဲ့ပါတယ်။
မြန်မာနိုင်ငံဟာ ကမ္ဘာမှာ မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်ကြောင့် သေဆုံးသူ အများဆုံးနိုင်ငံ ဖြစ်လာတယ်လို့ နိုင်ငံတကာ မြေမြှုပ်မိုင်း သုံးစွဲမှု ပပျောက်ရေး လှုပ်ရှားမှုအဖွဲ့- ICBL ရဲ့ ပြီးခဲ့တဲ့ နိုဝင်ဘာ ၂၀ ရက် ထုတ်ပြန်တဲ့ အစီရင်ခံစာမှာ ဖော်ပြထားပါတယ်။
၂၀၂၃ ခုနှစ်အတွင်း မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်အကြွင်းအကျန်ကြောင့် မြန်မာနိုင်ငံတစ်ဝှမ်းက လူ ၁ ထောင်ကျော် (၁,၀၀၃ ဦး)သေဆုံးခဲ့တယ်လို့လည်း ICBL က ထုတ်ပြန်ထားပါတယ်။
