ပိုႈလဘား၊ ကျံရ်ဆဲပ်တီမ်ဘာ ဆငည်း 5၊ လာဆေဝ်
တိုအီးခေဲင်အရာပ်အူအီး က္လာင်းဒါႈ ဂေါႇမိုႈဖုင်တံပ်ကိုးကာင်း MNDAA ကဲ မဲႈကောန်အီမာည်းအူအီး အ်ုန်အီဂေါည်ပရဝ်နံမ့်စါမ် လှံင်လာဆေဝ်နီန်အူအီး စီပဲန် ပဲန်ဟာဝ်းပွံတ် ဘံင်လိုဘ္လာႈႎဲႈအောႏ။
ခည်ကျံရ်အောဂ်ုတ် ဆငည်း 26ဒိူန် ဖုင်တံပ်ကိုးကာင်းကဲ ဘည်မိုႈမာ်အာဝ်မိူဝ်ႈ မဲႈဟာဝ်း မာည်းအစါမ် ဘိူန်းအဆာက် 26ဆန်ုမ် အ်ုန်အီဂေါည်ပရဝ်နံမ့်စါမ်နီန် ပဒီလီပ်ခေဲင်ရဝ်ကဲအောႏ။
ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းဒါႈ “ဂေါႇမိုႈတံပ်ကိုးကာင်းကဲဒီန် ဇူႈအ်ုန် စီပဲန်ခေဲင်ႎဲ့အ်ုန် ဟည်အာႈဒိုႇ။ ဘ်ုပ်ႎီရ်ဘ္လာႈအ်ုန်ဒီန်။ ခိင်မဲႈကဲဒီန် ႎည်းအ်ုန်ဘိူည်လီပ်ခြဲ ကနာည်နှာင်းအာဝ်မဲႈအ်ုန်ဒီန်မာ် ကဲကထိုပ်ဘိုး ကလာႎည်းအ်ုန်ဒီန်”
ကဲဒါႈ မာည်းအစါမ် ကဝ်အီကတူႈမဲႈနီန် အ်ုန်ဂေါည်ဆနံမ်တိုအ်ုန် ပယုင်ဆနံမ်ဒါင်း လာဆေဝ်အောႏ။
တိုအီးခေဲင်အရာပ် ကဝ်ရကႎိုည်နီန် က္လာင်းဒါႈဘိုး “ကိုးကာင်းကဲ ဒဲႈဖါ်ႈရိူန်းတကဲ 10ဆဲန် အမှုလှေနီန် ဟောည်ႇဟာဝ်းလိူည် ဘည်နီန်။ ကဇေန်နီး အ်ုန်ဆီုင်ဂေါည် ပယုင်ဆနံမ်ဒါင်း။ ဒီဆဲဝ်အ်ုန်ဒီန် ဟည်ရာမ်ဂဲန်ယာ့်။ ကြောႈမာ် အ်ုန်ဟည်ဘယ်ဒေ ယိူဝ်ႇအံက်ဒါကြောႈယာ့်”
ဘိူန်းအယ်နံပ် တတိုအီးခေဲင်အရာပ်ကဲ က္လာင်းဒါႈ ဘာည်းလိူည်ဒီန် ခည်ကျံရ်ဇူန်လည်ဒိူန်မာ် မိူဝ်ႈအေ့ဘည်လီပ်မဲႈ တံပ်ကိုးကာင်းကဲ တကောန်အီမာည်း ဘိူန်းအဆာက် 27ဆန်ုမ် အ်ုန်အီဂေါည်ပရဝ်နံမ့်စါမ်နီန်ခေဲင်ဂါင်အောႏ။
ဆဲႈဒါႇဒီန် ခည်ကျံရ်မာချှ် ဆငည်း 7ဒိူန်မာ် ဘိူန်းအယ်နံပ်ကဲဒါႈ တံပ်ကိုးကာင်းကဲ စွဲဖါ်ႈတိုည်းမဲႈ တိုအီးရဝ်မန်တုံ လှံင်အေဲမ်ကိုက်ကဲနီန် 3အီး ဒါႈမိုႈကဲဘြားဟေအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
