မိုင်းအရှိုင်း၊ စက်တင်ဘာ ၅ ရက်၊ ကျောက်မဲ
တအာင်းတပ် – PSLF/TNLA ထိန်းချုပ်ထားတဲ့ ရှမ်းမြောက် ကျောက်မဲမြို့ကို ပြန်လည်သိမ်းပိုက်ဖို့ ထိုးစစ်ဆင်နေတဲ့ စစ်ကောင်စီတပ်တွေက ရှေ့တိုးလာနိုင်ခြင်း မရှိသေးဘဲ နောင်ပိန်အုပ်စု ပင်တိန်ကျေးရွာမှာပဲ သောင်တင်နေတယ်လို့ စစ်ရေးသတင်းရင်းမြစ်တွေက ရွှေဖီမြေကို ပြောပါတယ်။
“အပြန်အလှန် ငါတို့ထိုးနေတာ။ လောလောဆယ် သူတို့ ငြိမ်နေတာ။ နောင်ပိန်ကို မကျော်နိုင်သေးဘူး။ ဒရုန်းတွေကတော့ နေ့တိုင်း သုံးလေးစင်း လွှတ်တာမျိုး။ အသေခံဒရုန်း လွှတ်တာမျိုးတွေတော့ ရှိတယ်။ ဗုဒ္ဓဟူးနေ့တုန်းက အဆိပ်ငွေ့ဗုံးပါ ပြန်သုံးနေတာ” လို့ ဆိုပါတယ်။
ပြီးခဲ့တဲ့ ဩဂုတ်လအတွင်းက တရုတ် စီစဉ်ပေးတဲ့ ကူးမင်းဆွေးနွေးပွဲ မပြေလည်တာကြောင့် TNLA ဘက်က ကျောက်မဲမြို့ မကျရေး အင်အားဖြည့် ခုခံနေပြီး ဒီနေ့ စက်တင်ဘာ ၅ ရက်အထိ စစ်ကောင်စီတပ်ရဲ့ စစ်ကြောင်းတွေဟာလည်း နောင်ပိန်ကို မကျော်နိုင်သေးဘဲ သောင်တင်နေတယ်လို့ သိရပါတယ်။
ဒါ့အပြင် စစ်တပ်က ပင်တိန်ကျေးရွာကို ရောက်ရှိလာဖို့ ဒရုန်း၊ လက်နက်ကြီး စတဲ့ လက်နက်မျိုးစုံကို အသုံးပြု တိုက်ခိုက်ခဲ့တာကြောင့် ပင်တိန်ကျေးရွာထဲက နေအိမ်တွေလည်း ပျက်စီးသွားခဲ့ပါတယ်။
ရှေ့တန်း သတင်းရင်းမြစ်တစ်ဦးက “ပျက်စီးတာ အတိအကျ မရေနိုင်ပါဘူး။ စကုဒ်ထောက်ကြည့်တာ တချို့ အမိုးတွေ ပေါက်ပြဲတာ။ တချို့ဆိုရင် မီးလောင်နေဆဲ” လို့ ပြောပါတယ်။
စစ်ကောင်စီတပ်တွေက ပြီးခဲ့တဲ့ ဩဂုတ်လ ၁၉ ရက်က စတင်ပြီး ရှမ်းတပ် SSPP စိုးမိုးထားတဲ့ နောင်ပိန်ကျေးရွာကို လေကြောင်းကနေ ဗုံးကြဲတိုက်ခိုက်တာတွေ မြေပြင်အင်အား အလုံးအရင်းနဲ့ ထိုးစစ်ဆင်တာတွေ လုပ်ဆောင်လာပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
