ယာရူစိင်၊ ကျံရ်ဆဲပ်တီမ်ဘာ ဆငည်း 4၊ လောက်ကည်
ဘဝ်ရမာအ်ုန်ကဲ က္လာင်းတဆျှိုည်ဖီမျေဒါႈ မော်င်အည့်ယီ ဘိူန်းအဆာက် 25ဆန်ုမ် အ်ုန်အီဟာဝ်းတိုန်း တိုအီးယိူဝ်ႇကီုင်းပါင်ဆာင်း အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက် “ဝ” UWSA ကဲ ဟာဝ်းကဒါႇကီုင်းလောက်ကည် အ်ုန်အီမိုႈ ဒီပ်ုန်ထိင်ခြဲအူန်း တံပ်ကိုးကာင်းကဲနီန် အာဝ်မိုႈစိအ်ုန်ဟြာည်ကမာ်ႈ မိုႈအ်ုန်ကတူႈအီးပျံမ်းယံမ်းအ်ုန်အောႏ။
မော်င်အည့်ယီနီန် အ်ုန်ယိူဝ်ႇတိုန်းတိုအီး ယိူဝ်ႇကဒါႇကီုင်းပါင်ဆာင် ဟာဝ်းကဒါႇလောက်ကည်နီန် ခည်ကျံရ်အေပ်ြုရ် ဆငည်း 20ဒိူန် ဆဒါင်မာ်အာဝ်ဘိူန်း အ်ုန်ဟြာည်ကမာ်ႈဟာဝ်းဖါ်ႈဘည်နီန် ဘံန်ရောတ် ကျံရ်အေပ်ြုရ် ဆငည်း 25 စီႎီရ်ယိူဝ်းလိူည် တိုပိုင်းခန္ဓာယံမ်းအ်ုန်အောႏ။
ဆာ်မိုႈတိုပိုင်းခန္ဓာယံမ်း မော်င်အည့်ယီဒီန် ကဲယိူဝ်းပကောက်ဒေင် ခနားချှီန်းဆျှိုည်ဟော်ကာည်း လောက်ကည်နီန် အူလှေအောႏ။
ကဝ်အီဂေါည်ကဒံတ်တောပ်အ်ုန်နီန်အူအီး က္လာင်းဒါႈ “မိုႈတိုအီးအီဘကားအ်ုန် 2အီးဂါရ်ဒီန် အီစိုန်ဖါ်ႈ ပျံမ်းယံမ်းအ်ုန်။ ဆာ်မိုႈ 2အီးဂါရ်ဒီန် ပလိက်ကဲ နံပ်အေ့ မိုႈတကဝ်မှောမိုႈ တိုအီးမှော။ မိုႈလိူည် မောကံပ်ရောတ်ကဇေန်နီး ညှံမ်ယိူဝ်းစိကဲဒါႈ ဟည်ဘိူန်းဒေတိုည်းဒီန်။ ဇူႈဇူႈအ်ုန် ကဲတံမ်းအူန်းယဲ ကနာည်နှာင်းအာဝ်ဟြာင်းဆဒါင်လှေနီန်။ ကဲဒါႈ ဆာ်ဟည်ဘိူန်းတိုည်း ကဝ်အီလူည်ႇအမှုနီန် ကဲနံင်က္လာင်းဒေဲႈ။ မောကံပ်ရောတ်ကဇေန်နီး ဘံန်မိုႈကဲအာဝ်ပ္လါန်ဒေဲႈ ယဲမာ် အာဝ်မိူဝ်ႈယာ့်ပ်ုန်မောင်ဒီးကော်”
မော်င်အည့်ယီနီန် အ်ုန်မိုႈဖါ်ႈအီဂေါည် ပလာဆေဝ် ဂေါႇမိုႈဘဝ်ရမာအ်ုန်ကဲ ဟြာင်းက္လာင်းအူန်း တောပ်ဘည်ကဆီုဝ်ကဆဲင် ဘည်ကတူႈတပျံမ်းနီန် တဖုင်ကိုးကာင်း စီပဲန်ကဲဒါႈ တံပ်ကိုးကာင်းကဲ ဆီုင်ဒါ့်တခေါရ်အူန်းအောႏ။
ခေဲင်ကျံရ်နီန် ဘည်အာဝ်ဘိူန်းဒါဆဒါင် ဟြာည်ကမာ်ႈဟာဝ်းဘည်နီန်နီး ဟည်ရာမ်ပဲန်ကစံပ်ဖါ်ႈ ခေးလျန် ဘိူန်းအဆာက် 24ဆန်ုမ် အ်ုန်အီမိုႈကညာကား ယိူဝ်ႇကဒါႇကူန်လိုင် လေႈဒေဲႈကဒါႇလာဆေဝ်နီန်မာ် ဟာည်ကမာ်ႈဟာဝ်းဖါ်ႈ ဇူႈကျံရ်ဆဲပ်တီမ်ဘာ ဆငည်း 1 မောကံပ်ရောတ်ဆငည်း အဒိူဝ်နီန် ညှံမ်ဘိူန်းစိကတူည်ႇကႎှတအ်ုန်အောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
