လွေးဇွန်မိုး၊ စက်တင်ဘာ ၃ ရက်၊ နမ္မတူ
တအာင်းတပ် TNLA ထိန်းချုပ်ထားတဲ့ ရှမ်းမြောက် နမ္မတူမြို့နယ် ၁၂ မိုင်ကုန်းမှာ ကားနဲ့ ဆိုင်ကယ် တိုက်မိဖြစ်ပြီး ဆိုင်ကယ်စီးလာတဲ့ အမျိုးသား ၂ ဦး သေဆုံးသွားခဲ့တယ်လို့ သိရပါတယ်။
မနေ့ စက်တင်ဘာ ၂ ရက် နေ့လည် ၃ နာရီဝန်းကျင်က မန်တုံကနေ နမ္မတူကို လာတဲ့ ကားတစ်စီးနဲ့ နမ္မတူကနေ လာတဲ့ ဆိုင်ကယ်တစ်စီး တိုက်မိပြီး ဆိုင်ကယ်စီးလာတဲ့ အသက် ၂၁ အရွယ် အမျိုးသား ၁ ဦး နေရာမှာပဲ ပွဲချင်းပြီးသေဆုံးခဲ့ပါတယ်။
နောက်တစ်ဦးကတော့ နမ္မတူဆေးရုံမှာပဲ သေဆုံးသွားခဲ့တယ်လို့ ဖြစ်စဥ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“ဆိုင်ကယ်စီးလာတဲ့ ကောင်လေးနှစ်ယောက်က တစ်ယောက်ကတော့ ဟိုမှာကတည်းက ပွဲချင်းပြီး။ နောက်တစ်ယောက်ကကျတော့ သူတို့နမ္မတူဆေးရုံကို ခေါ်လာမှ သေသွားတာ”
သေဆုံးသွားတဲ့ အဲဒီအမျိုးသား ၂ ဦးဟာ နမ္မတူမြို့နယ် ဟူးဆာကျေးရွာမှာ နေထိုင်သူတွေဖြစ်တယ်လို့ သိရပါတယ်။
ယာဥ်တိုက်မှုဖြစ်ပွားပြီးနောက် ကားသမားက ထွက်ပြေးသွားပြီး TNLA ရဲ့ မြို့နယ် တရားဥပဒေစိုးမိုးရေးတပ်ဖွဲ့က လိုက်လံရှာဖွေနေဆဲဖြစ်တယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
