လွေးဇွန်မိုး၊ စက်တင်ဘာ ၁ ရက်၊ မူဆယ်
ရှမ်းမြောက် တရုတ် – မြန်မာနယ်စပ် မူဆယ်မြို့ကနေ တရုတ်ပြည် ရွှေလီမြို့ထဲကို အလုပ်လုပ်ဖို့သွားတဲ့ အသက် ၁၄ နှစ်အရွယ် လွေးရွှေငြိမ်းဆိုသူဟာ ၃ လကျော်ကြာ မိသားစုဝင်တွေနဲ့ အဆက်အသွယ်မရပဲ ပျောက်ဆုံးနေတယ်လို့ မိသားစုတွေဆီက သိရပါတယ်။
လွေးရွှေငြိမ်းဟာ မူဆယ်မြို့ရှိ ကုန်စုံဆိုင်တစ်ဆိုင်မှာ အလုပ်လုပ်ရာကနေ ပြီးခဲ့တဲ့ မေလ ၂၅ ရက်မှာ တရုတ်ပြည် ရွှေလီမြို့ထဲကို အလုပ်ရှာပေးမယ်ဆိုပြီး မူဆယ်မြို့ရှိ ပွဲစားအမျိုးသမီးတစ်ဦးက ခေါ်သွားခဲ့ရာကနေ ပျောက်ဆုံးနေတာလို့ ၎င်းရဲ့ မိသားစုဝင်တစ်ဦးက ပြောပါတယ်။
“သူ(တရုတ်ပြည်ထဲ)စဝင်တဲ့အချိန်က အဆက်အသွယ်ရတယ်။ အဲချိန်က သူပြောတာ အလုပ်က အဆင်ပြေပါတယ်တဲ့။ ဘာအလုပ်လုပ်လဲ မသိရဘူး။ အဲဒီ နောက်ထပ်တစ်ပတ်လောက်ဆို ဆက်သွယ်လို့ မရတော့ဘူး။ အဲဒီပွဲစားနဲ့လည်း ပြန်ဆက်သွယ်လို့ မရတော့ဘူး”
လွေးရွှေငြိမ်းဟာ နမ့်ဆန်မြို့နယ် နမ့်လင်းကျေးရွာအုပ်စု အောက်ပန်တောင်းရွာမှာ နေထိုင်ပြီး သူငယ်ချင်းဖြစ်သူနဲ့ မူဆယ်က ကုန်စုံဆိုင်တစ်ခုမှာ အလုပ်သွားလုပ်ရာကနေတစ်ဆင့် တရုတ်ပြည်ထဲကို ပွဲစားနဲ့ ဝင်သွားခဲ့တာ ဖြစ်ပါတယ်။
အလားတူ အသက် ၂၀ နှစ်ဝန်းကျင်အရွယ် လွေးဆိုင်ယဉ်ဟာလည်း ပြီးခဲ့တဲ့ ဩဂုတ်လ ၁၅ ရက်မှာ မူဆယ်မြို့ထဲက ဂိမ်းဆိုင်တစ်ခုမှာ အလုပ် သွားလုပ်ရာကနေ ပြီးခဲ့တဲ့ ဩဂုတ်လ ၁၉ ရက်ကနေ ဒီနေ့ စက်တင်ဘာ ၁ ရက်အထိ အဆက်အသွယ်မရဘဲ ပျောက်ဆုံးနေတယ်လို့ ၎င်းရဲ့ မိခင်ဖြစ်သူက ပြောပါတယ်။
“အဲနေ့က သူ့အဖေလည်း အဖမ်းခံရတာ။ သူလည်း မူဆယ်က ဂိမ်းဆိုင်တစ်ခုမှာ အလုပ်လုပ်မယ်လို့ ပြောတယ်။ ယောကျာ်းလေးတစ်ယောက်နဲ့ မူဆယ်ဘက် ဆိုင်ကယ်စီးသွားတယ်။ သူဂိမ်းဆိုင်မှာ လုပ်တာ ဝါသနာပါတယ်ဆိုပြီး သူသွားတာ။ မူဆယ်ရောက်တာ တစ်ပတ်လောက်ရှိမယ်ထင်တယ်။ အဆက်အသွယ်ရသေးတယ်။ နောက်မှ မရတော့ဘူး။ ကြားတာကတော့ အဲနေ့က သူတို့ညဘက်သွားလည်ရင်းနဲ့ ပျောက်သွားတယ်လို့ ကြားထားတယ်”
မိသားစုဝင်တွေက စိတ်ပူနေတာကြောင့် ပျောက်ဆုံးသွားတဲ့ အမျိုးသမီး ၂ ဦးကို တွေ့ရှိသူတွေအနေနဲ့ ဆက်သွယ်အကြောင်းကြားပေးဖို့ မိသားစုဝင်တွေက တောင်းဆိုထားပါတယ်။
ဒါ့အပြင် မိုးမိတ်မြို့နယ် အုံးကြောရွာဟောင်းမှာ နေထိုင်တဲ့ အသက် (၃၃)နှစ်အရွယ်ရှိတဲ့ အိုက်ဆုပ်ဆိုသူလည်း ဖေဖော်ဝါရီ ၁၀ ရက်ကတည်းက အလုပ်ထွက်ရှာဖို့ဆိုပြီး နေအိမ်ကနေ သိန်း (၂၀)နဲ့ ထွက်သွားရာကနေ ဒီနေ့ဒီအချိန်ထိ မိသားစုဝင်တွေနဲ့ အဆက်အသွယ်မရပဲ ပျောက်ဆုံးနေတယ်လို့ မိသားစုဝင်တွေက ရွှေဖီမြေကို ပြောဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
