ပို့လဘား၊ ဇန်နဝါရီ ၇ ရက်၊ မူဆယ်
ရှမ်းမြောက် မူဆယ်မြို့ထဲက ရပ်ကွက်တချို့မှာ ဧည့်စာရင်း အကြောင်းပြပြီး ငွေ လိုက်ေကာက်တာတွေ ရှိနေတယ်လို့ စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၁ ရက်က စစ်ကောင်စီတပ် ထိန်းချုပ်ထားတဲ့ မူဆယ်မြို့ တော်ရွက်ရပ်ကွက်မှာ အုပ်ချုပ်ရေးမှူးက ဧည့်စာရင်း တင်ဖို့ဆိုပြီး ရွှေ့ပြောင်း အလုပ်သမားတွေကို ငွေတောင်းခဲ့တယ်လို့ ကြုံတွေ့ခဲ့ရသူတစ်ဦးက ပြောပါတယ်။
“တချို့ရပ်ကွက်တော့ ကောက်တာမျိုး မရှိဘူး။ အုပ်ချုပ်ရေးမှူးက အိမ်ငှားတဲ့သူနဲ့ အိမ်ရှင်တွေကို ဆင့်ခေါ်ပြီး စာရွက်စာတမ်းတွေ ပေးလိုက်တာ။ အိမ်ရှင်တွေက အိမ်ငှားတဲ့သူတွေကို ဖြန့်ပေးပြီးတော့ မိသားစုဓာတ်ပုံ ၂ ပုံ တောင်းတယ်။ ပြီးရင် သူတို့ပေးတဲ့ စာရွက်စာတမ်းတွေ ဖြည့်ရတယ်။ တစ်အိမ်မှာ လူဘယ်နှစ်ယောက် ရှိလဲပေါ့ အဲလိုမေးတယ်။ ၆ ယောက် ရှိရင်လည်း အကုန်ပေးရတယ်။ ပိုက်ဆံ တစ်ယောက် တစ်သောင်းခွဲ ပေးတယ်။ တစ်နှစ်စာဆိုပြီးဧည့်စာရင်း တင်မယ် ပြောတယ်”
အုပ်ချုပ်ရေးမှူးက တော်ရွက်ရပ်ကွက်မှာ နေထိုင်တဲ့ ရွှေ့ပြောင်း အလုပ်သမားတွေထဲက အသက် ၁၈ နှစ်အထက်ကိုသာ ငွေတောင်းပြီး အသက်မပြည့်သေးသူတွေကိုတော့ ငွေတောင်းတာ မရှိဘူးလို့ ဆိုပါတယ်။
ကြုံတွေ့ခဲ့ရသူဟာ ပြီးခဲ့တဲ့ ၂၀၁၉ ကတည်းက မူဆယ်မြို့မှာ နေထိုင်လာတာဖြစ်ပြီး အခုလို ငွေတောင်းတဲ့ဖြစ်စဥ်မျိုး တစ်ကြိမ်မှ မကြုံခဲ့ရကြောင်းကိုလည်း သူက ဆက်ပြောပါတယ်။
မူဆယ်မြို့ ပေါင်လုံရပ်ကွက်မှာ နေထိုင်တဲ့ ရွှေ့ပြောင်း အလုပ်သမားတွေကိုတော့ အုပ်ချုပ်ရေးမှူးက ငွေကောက်တာ မရှိဘူးလို့ ပေါင်လုံမှာ နေထိုင်တဲ့ အမျိုးသားတစ်ဦးက ပြောပါတယ်။
“အဲလိုမျိုး မရှိဘူးနော်။ မြင်လည်း မမြင်ဖူးဘူး။ ဒီမှာ ပြောင်းပြီး ငှားနေတာ ၂ နှစ် ရှိပြီ။ ဘယ်အုပ်ချုပ်ရေးမှူး လာကောက်တာ မရှိဘူး။ အိမ်ရှင်တွေ ကောက်တာပဲရှိတယ်”
မူဆယ်မြို့မှာ လောင်းကစားဝိုင်း ပေါများပြီး ငွေလိမ်မှုနဲ့ တော်လှန်ရေးတပ်နာမည်အသုံးပြုပြီး ငွေ လိမ်လည် ကောက်ခံတာတွေလည်း မကြာခဏ ဖြစ်ပွားနေပါတယ်။
