ဝတ်ရည်၊ မေလ ၁၃ ရက်၊ ဖားကန့်
စစ်ကိုင်းတိုင်း ဝက်လက်မြို့နယ်မှာ ပေါင် ၂၅၀ ဗုံး ၂ လုံးနဲ့ တိုက်ခိုက်ခံရတာကြောင့် သံဃာတော် ၁ ပါးအပါအဝင် ၂ ဦး ထိမှန်ဒဏ်ရာရရှိခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ မေလ ၁၃ ရက် နေ့လယ် ၁၂ နာရီခွဲမှာ ဝက်လက်မြို့နယ် နဘဲပင်လှကျေးရွာရှိ ဘုန်းကြီးကျောင်းကို စစ်ကောင်စီတပ်က ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ကြဲချတိုက်ခိုက်ခဲ့တာလို့ ဆိုပါတယ်။
“လက်ရှိမှာက မြေပြင်စစ်ကြောင်းထိုးတာလည်း မရှိဘူး။ အကြောင်းမဲ့သက်သက် ဘုန်းကြီးကျောင်းကို ပစ်သွားတာ။ ပစ်တာက တစ်ကြိမ်ထဲကို ဗုံး ၂ လုံး ဆက်တိုက်ပစ်သွားတာ” လို့ ဒေသခံ အမျိုးသားက ပြောပါတယ်။
စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် သံဃာတော် ၁ ပါးနဲ့ အမျိုးသား ၁ ဦးတို့ ဒဏ်ရာရရှိခဲ့ပြီး ဘုန်းကြီးကျောင်းဆောင် ၁ ဆောင်လည်း ထိမှန်ပျက်စီးခဲ့တယ်လို့ ဆိုပါတယ်။
ပြီးခဲ့တဲ့ မေလ ၅ ရက် ည ၁၂ နာရီခွဲဝန်းကျင်မှာလည်း ဝက်လက်မြို့နယ် စခန်းသာရွာအနီးကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၃ ဦး သေဆုံးခဲ့ပါတယ်။
စစ်ကောင်စီတပ်ဟာ ၎င်းတို့ လက်လွှတ်ခဲ့ရတဲ့ မန္တလေးတိုင်းအပါအဝင် စစ်ကိုင်းတိုင်းနဲ့ မကွေးတိုင်းအတွင်းက နယ်မြေတွေကိုလည်း မြေပြင်ထိုးစစ်တွေ ဆက်တိုက်လုပ်ဆောင်နေသလို လေကြောင်းတိုက်ခိုက်မှုတွေကိုလည်း ဆက်တိုက်လုပ်ဆောင်နေတာကြောင့် ဒေသခံ ထိခိုက်သေဆုံးမှုတွေလည်း ဆက်ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
