ပျားကြီး၊ ဧပြီ ၂၆၊ ဆိပ်ဖြူ
မကွေးတိုင်း၊ ဆိပ်ဖြူမြို့နယ်မှာရှိတဲ့ ကျေးရွာ ၂ ရွာကို အကြမ်းဖက်စစ်တပ်က မီးရှို့ဖျက်ဆီးခဲ့တာကြောင့် လူနေအိမ်ခြေ ၁၀၀ ကျော်ပျက်စီးဆုံးရှုံးခဲ့တယ်လို့ ဒေသခံတွေက ရွှေဖီမြေကိုပြောပါတယ်။
မနေ့ ဧပြီလ ၂၅ ရက် နေ့လည်ပိုင်းက ဇီးဖြူကောင်းနဲ့ ရေပုတ်ကျေးရွာ ၂ ရွာကိုတိုက်ပွဲဖြစ်ပွားမှုမရှိဘဲ စစ်ကြောင်းထိုးပြီးမီးရှို့ဖျက်ဆီးခဲ့တာဖြစ်ပါတယ်။
“နေ့ခင်းဘက် အရမ်းပူတဲ့အချိန်ကိုစစ်ကြောင်းဝင်လာတာ။ လူတွေက လူလွတ်ထွက်ပြေးလိုက်ရတယ်။ ဘာမှမယူနိုင်ဘူး။ အိမ်တွေကတော့ အကုန်ကုန်သလောက်ဖြစ်သွားပြီ”လို့ ဇီးဖြူကောင်းကျေးရွာကဒေသခံတစ်ဦးကပြောပါတယ်။
အိမ်ခြေ ၁၀၀ ကျော်စီရှိတဲ့ ကျေးရွာ ၂ ရွာမှာ ဇီးဖြူကောင်းကျေးရွာက လူနေအိမ် ၇၈ လုံးနဲ့ ရေပုတ်ကျေးရွာက အိမ် ၂၀ ကျော်မီးရှို့ဖျက်ဆီးခံခဲ့ရတာဖြစ်ပါတယ်။
အဲ့ဒီအပြင် ညနေပိုင်းမှာလည်း ဆိပ်ဖြူ – ဆောလမ်းပေါ်က ၁၀ မိုင်လမ်းဆုံစစ်တပ်အထိုင်စခန်းကနေ ဒေသခံတွေထွက်ပြေးတိမ်းရှောင်ရာနေရာတွေဘက်ကိုပစ်မှတ်ထားပြီး လက်နက်ကြီးနဲ့ ၁၀ ကြိမ်
ထက်မနည်းပစ်ခတ်မှုတွေ ပြုလုပ်ခဲ့တယ်လို့ဒေသခံတွေကဆိုပါတယ်။
လက်နက်ကြီးပစ်ခတ်မှုတွေကြောင့်လူထိခိုက်ဒဏ်ရာရမှုတွေရှိတယ်လို့ ဒေသခံတွေကဆိုပေမဲ့ ရွှေဖီမြေအနေနဲ့ သီးခြားအတည်ပြုနိုင်မှုတော့မရှိသေးပါဘူး။
လက်ရှိအချိန်မှာ ထောင်နဲ့ချီတဲ့ဒေသခံတွေဟာ ဘေးလွတ်ရာတောတောင်တွေထဲမှာပုန်းအောင်းနေထိုင်နေရပြီး စားနပ်ရိက္ခာ၊ သောက်သုံးရေနဲ့ အမိုးအကာအရေးပေါ်အကူအညီတွေလိုအပ်နေတယ်လို့ ဒေသခံတွေကဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
