မိုင်းရူပ၊ ဇွန်လ ၁၇ ရက်၊ ဝက်လက်
စစ်ကိုင်းတိုင်း ဝက်လက်မြို့နယ်ရှိ နတ်ကုန်းရွာသစ်နဲ့ ဝက်လူးအိုင်ရွာထဲကို စစ်ကောင်စီတပ်ဘက်က အသေခံဒရုန်းနဲ့ ဗုံးကြဲခဲ့ရာ အမျိုးသမီးတစ်ဦး သေဆုံးပြီး အမျိုးသမီး ၂ ဦး ထိမှန်ဒဏ်ရာရခဲ့တယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
မနေ့ ဇွန်လ ၁၆ ရက် နေ့လည် ၂ နာရီဝန်းကျင်မှာ နတ်ကုန်းရွာသစ်နဲ့ ဝက်လူးအိုင်ရွာထဲကို စစ်ကောင်စီတပ်ဘက်က တိုက်ပွဲဖြစ်ပွားတာမရှိဘဲ အသေခံဒရုန်း ၄ စီးနဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
“အခု ကြဲခံရတဲ့ရွာတွေက ဝက်လက်နယ် တောင်ခြမ်းပေါ့။ တစ်ရွာကို အသေခံဒရုန်း ၂ စီးနဲ့ လာကြဲတာ။ အသက် ၅၀ ကျော် အန်တီကြီးတစ်ယောက် ထိပြီး ဆုံးသွားတယ်။ နောက် ဒဏ်ရာရတဲ့ ၂ ဦးလည်း အမျိုးသမီးတွေပဲ” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စစ်ကောင်စီတပ် အသေခံဒရုန်းနဲ့ ဗုံးကြဲတိုက်ခိုက်တဲ့ရွာဟာ တိုက်ပွဲဖြစ်ပွားတာမရှိသလို တော်လှန်ရေးတပ်တွေ နေထိုင်တာလည်း မရှိဘဲ အရပ်သားတွေကို တိုက်ခိုက်ခဲ့တာ ဖြစ်တယ်လို့ ၎င်းက ဆက်ပြောပါတယ်။
စစ်ကောင်စီက ၎င်းလက်လွှတ်ထားရတဲ့ နယ်မြေတွေကို ဆက်တိုက် ထိုးစစ်ဆင်တိုက်ခိုက်နေသလို ဗုံးကြဲတိုက်ခိုက်မှုတွေလည်း ပြုလုပ်နေပြီး စစ်ကိုင်းတိုင်းထဲမှာတော့ နေရာအများစုကို တော်လှန်ရေးတပ်တွေဘက်က ထိန်းချုပ်ထားဆဲ ဖြစ်ပါတယ်။
အမျိုးသားညီညွတ်ရေးအစိုးရ (NUG) လူ့အခွင့်အရေးဆိုင်ရာ ဝန်ကြီးဌာနရဲ့ မတ်လ ၃၁ ရက်နေ့အထိ စာရင်းတွေအရ စစ်တပ်အာဏာသိမ်းပြီး ငါးနှစ်ကျော်ကာလအတွင်း စစ်ကောင်စီရဲ့ လေကြောင်းတိုက်ခိုက်မှုကြောင့် အရပ်သား (၅,၄၇၈) ဦး သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
