နော်ဂျား၊ ဖေဖော်ဝါရီ ၁၀ ရက်၊ မူဆယ်
စစ်ကောင်စီထိန်းချုပ်တဲ့ ရှမ်းမြောက်က နယ်စပ်မြို့ဖြစ်တဲ့ မူဆယ်မြို့ပေါ်က ရပ်ကွက် (၉) ခုမှာ မူးယစ်ဆေးဝါး လက်လီလက်ကား အရောင်းဆိုင်တွေကို ပြီးခဲ့တဲ့ ဖေဖော်ဝါရီလ ၁ ရက်နေ့မှာ တရားဝင်ရောင်းချခွင့် ပြုလိုက်ပြီလို့ သိရပါတယ်။
မူးယစ်ဆေးဝါး လက်လီလက်ကား အရောင်းဆိုင် (၃၃) ဆိုင်ကို ခရိုင်ရဲတပ်ဖွဲ့မှူးနဲ့ မြို့နယ်ရဲတပ်ဖွဲ့မှူးတို့ရဲ့ ခွင့်ပြုချက်နဲ့ တရားဝင်ရောင်းချခွင့် ပြုပေးလိုက်တယ်လို့ ဆိုပါတယ်။
အဲဆိုင်တွေကို မန်ပိန်း (၃၈) ၊ လွယ်ဆေး၊ တာမိုးညဲနဲ့ နမ့်ခမ်းမြို့မပြည်သူ့စစ်တွေက တာဝန်ခံပေးထားတယ်လို့လည်း ပြောပါတယ်။
ဆိုင်ဖွင့်မိန့်ကို မူဆယ်ခရိုင်ရဲတပ်ဖွဲ့မှူး ဒုတိယရဲမှူးကြီးပြည့်ဝင်းအောင်ရဲ့ လမ်းညွှန်မှုနဲ့ မြို့နယ်ရဲတပ်ဖွဲ့မှူး ရဲမှူးမိုးဇော်၊ စခန်းမှူး ဒုရဲမှူးနေယုဆန်း ဦးဆောင်တဲ့ CID မှုခင်းရဲတပ်ဖွဲ့၊ SB ရဲသတင်းတပ်ဖွဲ့၊ ဒန-ဒုစရိုက်နှိမ်နှင်းရေးရဲတပ်ဖွဲ့နဲ့ မူဆယ်(အထူး)မူးယစ်တပ်ဖွဲ့စု စတဲ့ အဖွဲ့တွေဖြစ်တယ်လို့ ရဲသတင်းရင်းမြစ်တွေက ပြောပါတယ်။
“မူဆယ်(အထူး)မူးယစ်တပ်ဖွဲ့စုကလည်း မူးယစ်ဆေးဝါးနဲ့ ပါတ်သက်ပြီး ပြသနာတစ်စုံတစ်ရာဖြစ်လာရင် ကိုယ့်ရဲ့အဖွဲ့စုကသာ တာဝန်ခံရမယ်။ လိုင်းကြေးကိုတော့ မြို့နယ်ရဲတပ်ဖွဲ့မှူးနဲ့နည်းတူ တစ်ဆိုင်ကိုသိန်း (၂၀) နူန်း ယူမယ်လို့ ပြောတယ်။ အဲလိုပြောပြီး အဖွဲ့ထဲ ပါဝင်လာခဲ့တာ” လို့ ရဲသတင်းအမြစ်တစ်ဦးက ပြောပါတယ်။
အဆိုပါဆိုင်တွေမှာ ဘိန်းဖြူ၊ K၊ ရာမ၊ ICE ၊ ဘိန်းမဲ၊ HAPPY WATER နဲ့ ဆေးခြောက် လက်လီလက်ကား ရောင်းချနေတယ်လို့ စုံစမ်းသိရှိရပါတယ်။
ဆိုင်တစ်ဆိုင်ရဲ့ လိုင်းကြေးဟာ တစ်လကို (၇၅) သိန်းလို့ မူလက သိထားပေမယ့် ဖေဖော်ဝါရီလအတွက်ဆိုပြီး ပြီးခဲ့တဲ့ ၆ ရက်မှာ သိန်း (၈၀) ကောက်ခံသွားတယ်လို့ ပြောပါတယ်။
ဖေဖော်ဝါရီ (၇) ရက်နေ့မှာလည်း မြို့ရှောင်လမ်းရှိ (၉၉) နိုင်းနိုင်းဂိမ်းဆိုင်နဲ့ တွဲပြီးဖွင့်ထားတဲ့ အဆိုပါမူးယစ်ဆေးဝါးအရောင်းဆိုင်ကို ရဲအယောင်ဆောင် ၃ ဦးက လာရောက်ကာ ငွေတောင်းခဲ့တဲ့ဖြစ်စဉ် ဖြစ်ပွားခဲ့ပြီး အဲဒီလူ ၃ ဦးကို မြို့မရဲစခန်းက အချုပ်ဆောင် (၂) မှာ ဖမ်းဆီးထိန်းသိမ်းထားတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
